За бяспеку разам

У рамках рэспубліканскай акцыі “За бяспеку разам” у Любчанскім дашкольным цэнтры развіцця дзіцяці Навагрудскага раёна прайшлі мерапрыемствы, накіраваныя на папярэджанне пажараў і вывучэнне правіл паводзін пры іх узнікненні.

Выхавальнікі ўстановы аформілі стэнды нагляднай агітацыі і куткі па пажарнай бяспецы, арганізавалі творчыя выставы сумесных з бацькамі работ “Пажарная бяспека”, “Бяспека дзяцей — наша агульная справа”, правялі для бацькоў кансультацыі і г.д. Выхаванцы старшай групы стварылі макет бяспечнага дома, які вучыць дзяцей правілам эксплуатацыі жылых памяшканняў.

Пад дэвізам “Дарослыя! Беражыце сваіх дзяцей!” прайшла акцыя ў пасёлку, дзе выхаванцы цэнтра раздавалі мясцовым жыхарам маляўнічыя лістоўкі з напамінам пра патрабаванні пажарнай бяспекі пры выкарыстанні пячнога ацяплення.

Запамінальным мерапрыемствам месячніка па пажарнай бяспецы стала квест-гульня “За бяспеку разам!”, у якой прынялі ўдзел дзеці разам са сваімі бацькамі. Рухаючыся па вызначаным маршруце, яны выконвалі заданні, якія дапамагалі сістэматызаваць веды дзяцей аб прычынах узнікнення пажараў і вучылі правілам паводзін у выпадку пажару. На станцыі “Вогненая віктарына” дзецям задавалі пытанні па пажарнай бяспецы. Разам з медыцынскім работнікам на станцыі “Хуткая дапамога” дашкаляты вывучалі правілы аказання першай дапамогі пры апёках. На станцыі “Тушым пажар” трэніраваліся ў тушэнні імправізаванага пажару. Падчас гульні сем’ям прыйшлося эвакуіравацца з “палаючага” памяшкання, абараняючы вочы і органы дыхання. Выхавальнікі таксама праверылі веданне дзецьмі нумара тэлефона пажарнай службы, уменне правільна паведаміць неабходныя даныя аб узгаранні.

Наталля НІЧЫПАРОВІЧ,
намеснік загадчыка па асноўнай дзейнасці Любчанскага ДЦРД Навагрудскага раёна.

 

Пакінуць каментарый

Ваш электронны адрас не будзе апублікаваны. Абавязковыя палі пазначаны *