Падчас цяжарнасці ў арганізме жанчыны адбываецца безліч змен. На жаль, не ўсе яны носяць станоўчы характар. Адной з непрыемнасцей, якія падпільноўваюць вас, з’яўляецца гінгівіт. Захворванне гэтае настолькі распаўсюджанае сярод цяжарных жанчын, што ў стаматолагаў нават ёсць такая фармулёўка “гінгівіт цяжарных”.
Чаму менавіта падчас цяжарнасці?
Калі вы ўважліва вывучылі свой план наведвання ўрачоў, то абавязкова адзначылі для сябе наяўнасць у ім стаматолага. Справа ў тым, што зубы падвяргаюцца вельмі сур’ёзнай нагрузцы, і праблема не ў тым, што вы цяпер будзеце есці “за дваіх”. У многіх жанчын падчас цяжарнасці кіслотнасць поласці рота змяняецца. Гэта адбываецца з-за дзейнасці гармонаў, а таксама і таму, што ў харчаванні пераважаюць вугляводы. У кіслым асяроддзі мікробы развіваюцца значна хутчэй.
Ёсць яшчэ адзін момант. Арганізму патрэбен кальцый, прычым у вялікай колькасці, бо костачкі дзіцяці фарміруюцца менавіта з кальцыю, які яно атрымлівае ад маці. Калі вы не забяспечыце сябе кальцыем у дастатковай колькасці, то ён будзе проста забірацца з вашых касцей і зубоў, якія з’яўляюцца своеасаблівым дэпо гэтага мінералу. Эмаль зубоў робіцца мякчэйшай і танчэйшай з-за недахопу кальцыю, бактэрыі размнажаюцца. Вось і ўсе ўмовы для развіцця самых распаўсюджаных хвароб поласці рота: карыесу і гінгівіту. Справа ў тым, што гінгівіт — гэта першы крок да парадантозу. Таму пажадана выявіць яго на самых ранніх стадыях ці ўвогуле папярэдзіць яго з’яўленне. Амаль 50% дарослых людзей пакутуюць на гінгівіт і нават не падазраюць аб гэтым. А сярод будучых матуль у сярэднім 20% хварэюць на гінгівіт. Але толькі ў 1,5% з іх гінгівіт — гэта вынік “работы” гармонаў цяжарнасці. Астатнія выпадкі — гэта проста абыякавыя адносіны да свайго здароўя.
У чым выяўляецца гінгівіт цяжарных?
Месцы прылягання дзясен да зубоў, а таксама прамежкі паміж зубамі, так званыя міжзубныя сасочкі, запаляюцца, могуць разрастацца. Пры найменшай траўме дзясны краваточаць. Ёсць добрыя навіна: у тым выпадку, калі гінгівіт з’яўляецца толькі ў перыяд цяжарнасці, ён можа знікнуць адразу пасля родаў. Але занадта разлічваць на гэта не варта. Бо вы маглі проста не ведаць аб існаванні хваробы раней.
Як клапаціцца аб зубах падчас цяжарнасці?
v Рэгулярна чысціць зубы пасля кожнага прыёму ежы, а менавіта, кругавымі рухамі ад дзясны да зуба. Лепш за ўсё выкарыстоўваць мяккую ці паўжорсткую зубную шчотку, каб не раздражняць адчувальныя дзясны. Паміж зубамі варта дадаткова чысціць спецыяльнай ніткай (флосам).
- Адзін-два разы за час цяжарнасці прайдзіце агляд і правядзіце прафесійную чыстку зубоў у стаматолага, каб ліквідаваць налёт у цяжкадаступных месцах.
- Абавязкова адпраўце мужа да стаматолага! Колькі б намаганняў вы ні прыкладалі, каб забяспечыць “стэрыльнасць” поласці рота, усё будзе марным, таму што першы ж пацалунак мужа верне “шкодную” мікрафлору.
- Калі ў першыя тры месяцы вас мучыць млоснасць, не чысціце зубы адразу пасля яды, таму што зубная эмаль адчувальная да салянай кіслаты страўніка. Прапалашчыце рот адразу пасля яды і пачысціце зубы праз дваццаць хвілін.
- Не злоўжывайце салодкім і кіслым. Калі вельмі хочацца шакаладу, то лепш адразу з’ядаць паўпліткі, чым есці па маленькім кавалачку на працягу дня. І не забудзьце пасля гэтага абавязкова пачысціць зубы!
- Абавязковай умовай для здаровых зубоў з’яўляецца правільнае харчаванне. Гэта значыць: мінімум адзін раз у дзень — агародніна, фрукты, зерневыя прадукты. Час ад часу перакусвайце свежай і сырой ежай і не надта пераварвайце стравы.
Мама, паклапаціся аб сваім здароўі! Гэта будзе адным з праяўленняў любові і клопату аб дзіцяці!
Наталля КУЛАГІНА.
