Размова аб навуцы і шляхах яе развіцця адбылася на сустрэчы навуковых работнікаў рэгіёна з кіраўніцтвам Гродзенскай вобласці. Больш за сто знакамітых вучоных і маладых даследчыкаў былі запрошаны на прыём ад імя старшыні Гродзенскага аблвыканкама, прысвечаны Году навукі ў Беларусі.
Пачалася сустрэча з азнаямлення з выставай, на якой былі паказаны распрацоўкі навукоўцаў трох універсітэтаў — ГрДУ імя Янкі Купалы, медыцынскага і аграрнага, навукова-даследчых інстытутаў. Распрацоўкі ў галіне навукова-метадычнага суправаджэння адукацыі прадставіў Гродзенскі абласны інстытут развіцця адукацыі. Усяго ў Гродзенскай вобласці працуюць чатыры УВА, тры акадэмічныя навукова-даследчыя інстытуты, ядро навуковага патэнцыялу складаюць 108 дактароў навук і больш за 700 кандыдатаў навук, адзін акадэмік і тры члены-карэспандэнты Нацыянальнай акадэміі навук Беларусі.
Старшыня Гродзенскага аблвыканкама Уладзімір Краўцоў, вітаючы ўдзельнікаў мерапрыемства, адзначыў вялікае значэнне навукі ў развіцці краіны, якое павінна асноўвацца на разумнай эканоміцы. Невыпадкова 2017 год аб’яўлены ў Беларусі Годам навукі. Вучоныя Гродзеншчыны атрымліваюць падтрымку на праекты і з абласнога інавацыйнага фонду. Так, у мінулым годзе былі прафінансаваны тры значныя праекты. Раней на сродкі фонду ў аграрным універсітэце была створана ўнікальная ДНК-лабараторыя — пакуль адзіная ў Беларусі, якая мае акрэдытацыю ў краінах Еўрапейскага саюза.
Прыярытэтнымі напрамкамі даследаванняў у Гродзенскім дзяржаўным універсітэце з’яўляюцца нана- і біятэхналогіі, экалогія, оптыка, лазерная фізіка, рэсурсазберажэнне. У Гродзенскім медыцынскім універсітэце паспяхова дзейнічае 14 навукова-педагагічных школ. У Гродзенскім дзяржаўным аграрным універсітэце створана цэнтральная навукова-даследчая лабараторыя з філіяламі на факультэтах, біятэхналагічны цэнтр па рэпрадукцыі жывёл.
Развіваецца ў вобласці і студэнцкая навука. Больш за тысячу студэнтаў за апошнія 20 гадоў станавіліся стыпендыятамі спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў. 135 студэнтаў за апошнія гады былі адзначаны прэміяй абласнога выканаўчага камітэта. Важным крокам у развіцці навуковага патэнцыялу маладых даследчыкаў і студэнтаў стане стварэнне ў гэтым годзе на базе ГрДУ імя Янкі Купалы з удзелам аграрнага і медыцынскага ўніверсітэтаў навукова-тэхналагічнага парка. Тут будуць працаваць разнастайныя лабараторыі, бізнес-інкубатар. Трэба адзначыць, што ў 2016 годзе ў Гродзенскай вобласці 26 вучоных ва ўзросце да 35 гадоў сталі дацэнтамі і кандыдатамі навук.
На прыёме віншавалі вучоных, якія дасягнулі ў мінулым годзе значных вынікаў у даследчай дзейнасці. Ганаровымі граматамі Гродзенскага аблвыканкама і абласнога Савета дэпутатаў адзначаны рэктар Гродзенскага дзяржаўнага медыцынскага ўніверсітэта Віктар Сняжыцкі за паспяховае кіраўніцтва школай “Клінічная арытмалогія”, высокую выніковасць у падрыхтоўцы навуковых работнікаў вышэйшай кваліфікацыі; загадчык кафедры матэматычнага аналізу, дыферэнцыяльных ураўненняў і алгебры ГрДУ Аляксандр Грынь — за развіццё матэматычных метадаў даследаванняў; дэкан біятэхналагічнага факультэта Гродзенскага дзяржаўнага аграрнага ўніверсітэта Яўген Дабрук — за вялікі асабісты ўклад у падрыхтоўку спецыялістаў і эфектыўную работу з таленавітымі маладымі навукоўцамі.
Ушанавалі і тых, каму ў мінулым годзе было прысвоена званне прафесара, хто атрымаў вучоную ступень доктара навук, абараніў дысертацыю.
На сустрэчы прысутнічалі намеснік старшыні Гродзенскага аблвыканкама Віктар Лісковіч, начальнік упраўлення адукацыі Гродзенскага аблвыканкама Аляксандр Сонгін.
Надзея ВАШКЕЛЕВІЧ.
Фота аўтара.
