З 29 кастрычніка па 1 снежня ў Мінску прайшоў Уcебеларускі злёт студэнцкіх атрадаў “Час руху!”. Студатрадаўцы мелі магчымасць узяць удзел у вечары знаёмстваў, спартыўных і адукацыйных праграмах і пляцоўках. Таксама адбыўся шэраг афіцыйных і творчых мерапрыемстваў.
У першы дзень форуму ў канцэртнай зале ЗАТ “Атлант” прайшла ўрачыстая цырымонія закрыцця трэцяга працоўнага семестра, на якой былі ўганараваны пераможцы рэспубліканскага конкурсу “Працоўны семестр” на лепшы студэнцкі атрад і лепшую арганізацыю, якая прымала студэнцкі атрад.
Ва ўрачыстасцях узялі ўдзел намеснік кіраўніка Адміністрацыі Прэзідэнта Рэспублікі Беларусь Андрэй Кунцэвіч, міністр адукацыі Рэспублікі Беларусь Ігар Карпенка, кіраўнікі ГА “БРСМ”, прадстаўнікі органаў заканадаўчай і выканаўчай улады, студэнцкіх атрадаў Беларусі і Расіі, вытворчых прадпрыемстваў, на базе якіх сёлета працавалі студэнцкія атрады, ветэраны студатрадаўскага руху.
“Я рады вітаць у гэтай зале лепшыя студэнцкія атрады Беларусі. Вітаць вас, людзей, якія сваёй працай і жаданнем змаглі зрабіць так, каб вамі ганарыліся вашы родныя і блізкія, вашы педагогі і аднакурснікі, вашы гарады і пасёлкі, каб вамі ганарылася ваша краіна! — адзначыў, звяртаючыся да прысутных, Андрэй Міхайлавіч Кунцэвіч. — На працягу ўсёй сваёй — больш як у паўстагоддзя — гісторыі студатрадаўскі рух Беларусі быў справай актыўных, нераўнадушных, адкрытых маладых людзей там, дзе гэта было найбольш патрэбна Радзіме. Таму нядзіўна, што студэнцкія атрады з беларускай прапіскай пакінулі яркі след на найбуйнейшых будоўлях Сібіры і Казахстана, на сельскагаспадарчых аб’ектах Малдовы і Краснадарскага краю. Нашых будатрадаўцаў ведалі і паважалі ў самых розных кутках Савецкага Саюза. У перыяд станаўлення незалежнай Беларусі студатрадаўскі рух атрымаў новы віток развіцця дзякуючы падтрымцы прэзідэнта нашай краіны А.Р.Лукашэнкі. Маладой беларускай дзяржаве неабходны вашы ініцыятыва і энергія, ваша смеласць і накіраванасць у заўтрашні дзень. У час работы ў студэнцкіх атрадах кожны з вас атрымаў першы працоўны і кіраўніцкі вопыт, які будзе надзвычай каштоўным для вашага далейшага прафесійнага станаўлення. Я ўдзячны Беларускаму рэспубліканскаму саюзу моладзі за пастаянны пошук новых форм студатрадаўскага руху. Гэты праект, як і многія іншыя праекты БРСМ, красамоўна сведчыць пра тое, што прыйшоў ваш час, час руху”.
У знак высокай ацэнкі працы А.М.Кунцэвіч уручыў пераможцам рэспубліканскага конкурсу “Працоўны семестр” пераходныя Ганаровыя сцягі Прэзідэнта Рэспублікі Беларусь. Высокія ўзнагароды атрымалі сельскагаспадарчы філіял “Вяснаэнерга” РУП “Віцебскэнерга” (у намінацыі “Лепшы наймальнік”) і будаўнічы атрад “Эўрыка” імя Героя Савецкага Саюза В.І.Еранько Полацкага дзяржаўнага ўніверсітэта як лепшы студатрад.
Падчас мерапрыемства былі ўзнагароджаны лепшыя студэнцкія атрады, іх камандзіры і камісары, лепшыя штабы працоўных спраў навучальных устаноў краіны.
Уручаючы ўзнагароды, міністр адукацыі Рэспублікі Беларусь І.В.Карпенка падкрэсліў важнасць студатрадаўскага руху: “Сёння мы не ўяўляем нашу сістэму вышэйшай, сярэдняй спецыяльнай і прафесійнатэхнічнай адукацыі без трэцяга працоўнага семестра. І гэта не толькі таму, што ён фарміруе важныя прафесійныя і асобасныя якасці. Праз гады вы будзеце праязджаць па нашай краіне і з гонарам гаварыць: вось гэты аб’ект я будаваў сваімі рукамі”.
Асобныя словы ўдзячнасці ад міністра прагучалі ў адрас педагагічных атрадаў. “Цэлае лета іх удзельнікі працавалі з дзецьмі, якія адпачывалі ў аздараўленчых летніках краіны. Яны не проста праходзяць практыку і асвойваюць азы педагагічнай прафесіі, а аддаюць сваю душу і сэрца падрастаючаму пакаленню, ствараючы будучыню нашай краіны”, — адзначыў Ігар Васільевіч.
Сёлета Усебеларускі злёт наведала вялікая дэлегацыя з Расіі. Упершыню, акрамя афіцыйных прадстаўнікоў агульнарасійскай арганізацыі студэнтаў “Расійскія студэнцкія атрады”, у Мінск прыехалі ўдзельнікі студатрадаў з розных гарадоў Расіі. Прадстаўнік цэнтральнага штаба студэнцкіх атрадаў, кіраўнік напрамку студэнцкіх педагагічных атрадаў РСА Кацярына Шаленева падкрэсліла, што ў студатрадаўскім руху Расіі і Беларусі існуе шмат агульнага, бо ў яго аснове ляжаць аднолькавыя прынцыпы першаснага працаўладкавання студэнтаў.
“Літаральна месяц назад беларуская каманда ўдзельнічала ва Усерасійскім злёце студатрадаў у Маскве, які быў прысвечаны 60годдзю студатрадаўскага руху і 15годдзю РСА, а сёння наша дэлегацыя ўдзельнічае ў злёце студэнцкіх атрадаў у Мінску, — паведаміла кіраўнік расійскай дэлегацыі. — У сваёй рабоце мы абапіраемся на традыцыі і каштоўнасці, якія былі закладзены яшчэ ў савецкі час, прыўносячы свае трэнды і павевы, рэалізуючы сучасныя праекты і сучасныя ўмовы працы — тое, што патрабуе сённяшняя моладзь, будуючы новую гісторыю развіцця студэнцкіх атрадаў. Мы добра разумеем, што без той метадычнай базы, якая напрацоўвалася многія гады, мы не можам рухацца далей. З беларускім студатрадаўскім рухам мы ідзём у адным напрамку”.
Трэці працоўны семестр 2019 года скончыўся, але ўжо сёння студатрадаўскі рух Беларусі чакае новых байцоў працоўнага фронту і будуе планы на наступны год.
Уладзімір ФАЛАЛЕЕЎ.
Фота аўтара.