Час збірацца ў школу!

У Беларусі арганізаваны маштабны продаж школьных тавараў да новага навучальнага года — па ўсёй краіне працуе больш за 700 школьных кірмашоў. Гандаль і прамысловасць пастараліся ўлічыць усе запатрабаванні пакупнікоў і сцвярджаюць, што попыт, які традыцыйна актывізуецца ў жніўні на тавары школьнага асартыменту, будзе забяспечаны цалкам.

— За апошнія 10 гадоў, калі ў навучальных установах агульнай сярэдняй адукацыі навучэнцам было рэкамендавана насіць адзенне дзелавога стылю, аб’ёмы продажу адзення для школьнікаў узраслі ў тры разы — з 300 да 900 тысяч штук, — гаворыць намеснік міністра гандлю Рэспублікі Беларусь Вячаслаў Драгун. — Сёлета неабходна “экіпіраваць” каля 976 тысяч навучэнцаў. Гэта на 21,6 тысячы чалавек больш у параўнанні з пачаткам мінулага навучальнага года.

Уся падрыхтоўчая работа па ўзгадненні асартыменту адзення дзелавога стылю і абутку для школьнікаў штогод праводзіцца загадзя да пачатку школьнага сезона. З гэтай мэтай Міністэрствам гандлю, Міністэрствам адукацыі і канцэрнам “Беллегпрам” зацверджаны сумесны план мерапрыемстваў па забеспячэнні вытворчасці, пастаўкі і рэалізацыі тавараў да новага 2016/2017 навучальнага года.

Узоры адзення дзелавога стылю зацвярджаюцца каардынацыйным саветам, у склад якога ўваходзяць прадстаўнікі міністэрстваў адукацыі, гандлю, аховы здароўя. Усе вырабы адпавядаюць патрабаванням тэхнічных рэгламентаў Мытнага саюза “Аб бяспецы прадукцыі, прызначанай для дзяцей і падлеткаў” і “Аб бяспецы прадукцыі лёгкай прамысловасці”.

Згодна з рэкамендацыямі Мінадукацыі, дзелавы стыль адзення — гэта строгі, вытрыманы стыль адзення, прызначаны для наведвання навучэнцамі 1—11 класаў вучэбных заняткаў ва ўстановах агульнай сярэдняй адукацыі. Камплект адзення дзелавога стылю павінен быць шматфункцыянальным, гігіенічным, зручным і адпавядаць сучасным кірункам моды.

Асноўныя пастаўшчыкі адзення дзелавога стылю і абутку для школьнікаў — 28 прамысловых прадпрыемстваў канцэрна “Беллегпрам”, якія з году ў год эфектыўна пра-цуюць над вытворчасцю вырабаў для школьнікаў, пашыраючы мадэльны рад, прымяняючы новыя тэхналогіі і тканіны, канструктарскія і дызайнерскія распрацоўкі, улічваючы вопыт мінулых гадоў, рэкамендацыі спецыялістаў гандлю і пажаданні пакупнікоў.

— Для дзяцей школьнага ўзросту ў бягучым навучальным годзе прамысловымі прадпрыемствамі швейнай галіны канцэрна “Беллегпрам” распрацавана каля 500 мадэлей адзення дзелавога стылю і больш як 300 мадэлей абутку, — гаворыць намеснік старшыні Беллегпрама Мікалай Рагожнік. — Асаблівых навінак, як у мінулыя гады (пінжакі для хлопчыкаў з кішэняй для мабільнага тэлефона, з тэрмометрам, з табліцай множання на падкладцы) не прапанавана. Разам з тым калекцыі новыя, асартымент шырокі і разлічаны на любы густ і фінансавыя магчымасці.

Акрамя прадпрыемстваў канцэрна “Беллегпрам”, гандлёвыя арганізацыі атрымліваюць тавары для школьнікаў і ад іншых прадпрыемстваў краіны без ведамаснай падпарадкаванасці.

Акрамя магазінаў адзення і абутку, на пачатку новага навучальнага года дзеці і бацькі спяшаюцца ў аддзелы з канцылярскімі таварамі, дзе ў доўгім спісе таго, што па-трэбна, пад нумарам адзін значыцца дзённік.

Па інфармацыі Міністэрства адукацыі, ва ўстановах агульнай сярэдняй адукацыі ў 2016/2017 навучальным годзе будуць выкарыстоўвацца дзённікі, зацверджаныя міністэрствам, выпуску 2014—2016 гадоў. На сайце Міністэрства адукацыі змешчаны ўзоры зацверджаных вокладак дзённікаў. Дарэчы, у 2016 годзе вытворчасць дзённіка ажыццяўляюць 8 паліграфічных прадпрыемстваў (у 2015 годзе — толькі адно).

Ну і, напэўна, самае актуальнае пытанне: колькі ж будзе каштаваць сабраць дзіця ў школу?

— Сёння варыяцыі мадэлей адзення для хлопчыкаў і дзяўчынак дазваляюць падабраць школьны “ансамбль” па гусце дзіцяці і ў рамках бюджэту сям’і, — гаворыць намеснік міністра гандлю Рэспублікі Беларусь Вячаслаў Драгун. — У 2016 годзе аптымальная экіпіроўка абыдзецца бацькам школьнікаў малодшых класаў у 150—690 рублёў, бацькам старшакласнікаў — 200—850 рублёў. Пакупніцкі набор як для хлопчыка, так і для дзяўчынкі знаходзіцца ў адным цэнавым сегменце. Адзначу, што цэны на ўсе нехарчовыя тавары фарміруюцца з улікам кан’юнктуры рынку, гэта значыць нічым не абмяжоўваюцца. Аднак, улічваючы сацыяльную значнасць мерапрыемстваў па падрыхтоўцы дзяцей да новага навучальнага года і фінансавую нагрузку на бацькоў, гандлёвыя арганізацыі прымяняюць на тавары школьнага асартыменту гандлёвую надбаўку не больш за 30%. На пастаяннай аснове праводзяцца мерапрыемствы і акцыі па продажы тавараў са скідкамі. Буйныя ўнівермагі праводзяць дні скідак са зніжэннем рознічных цэн на нехарчовыя тавары на 17—22%, што дазваляе пакупнікам сэканоміць значныя сродкі (зыходзячы са школьнай экіпіроўкі, ад 30 да 200 рублёў).

Акрамя таго, аказваецца адрасная сацыяльная дапамога. Універмагі сталіцы на пастаяннай аснове прадастаўляюць 10-працэнтную скідку на нехарчовыя тавары мнагадзетным сем’ям і грамадзянам, якія маюць патрэбу ў сацыяльнай падтрымцы, праз сацыяльныя дысконтныя карты. Гандлёвыя арганізацыі прапаноўваюць розныя праграмы крэдытавання і растэрміноўкі як за кошт уласных сродкаў, так і сумесна з банкамі.

У разгар падрыхтоўкі да новага навучальнага года пройдуць традыцыйныя кірмашы: 24—31 жніўня — у НВЦ “БелЭкспа” (міжнародныя спецыялізаваныя выставы-кірмашы “Нашым дзецям” і “Прывітанне, школа!”); 20—21 жніўня — у Мінску на пляцоўцы каля Палаца спорту (агульнагарадскі кірмаш “Час у школу!”); 11—21 жніўня — у сталічным Палацы мастацтваў (тэматычная выстава-кірмаш “Школьны кірмаш: ад А да Я”).

Правядзенне спецыялізаваных кірмашоў запланавана ў Мінскай вобласці: 13 жніўня — у Барысаве і Жодзіне; 20 жніўня — у Барысаве, Вілейцы, Любані, Маладзечне, Салігорску і Слуцку; 21 жніўня — у Нясвіжы; 27 жніўня — у Жодзіне і Вілейцы.

У Гродне з 18 ліпеня па 4 верасня праходзіць спецыялізаваны кірмаш “Прывітанне, школа!”, у якім прымаюць удзел 48 суб’ектаў гаспадарання: прадпрыемствы — вытворцы тавараў, арганізацыі гандлю, індывідуальныя прадпрымальнікі. У Гомелі з 15 ліпеня па 4 верасня арганізаваны пастаянна дзеючыя кірмашы ў раёне Гомельскага цэнтральнага рынка і гандлёвага дома “Рэчыцкі”, запланавана правядзенне школьных кірмашоў на плошчы Паўстання 13—14, 20—21, 27—28 жніўня і 3—4 верасня.
Мерапрыемствы пройдуць ва ўсіх рэгіёнах Беларусі і будуць суправаджацца забаўляльнымі праграмамі, конкурсамі для дзяцей, рэкламнымі акцыямі. Такі маштабны продаж школьных тавараў працягнецца да 10 верасня.

Марына ПЫРКОВА.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *