Сістэма адукацыі Рэспублікі Беларусь зрабіла крок далёка наперад. 14 студзеня 2022 года Прэзідэнтам нашай краіны А.Р.Лукашэнкам быў падпісаны закон “Аб змяненні Кодэкса Рэспублікі Беларусь аб адукацыі”, які ўступіць у сілу з 1 верасня 2022 года.
Члены маладзёжнага парламента пры Маладзечанскім раённым Савеце дэпутатаў азнаёміліся з асноўнымі змяненнямі кодэкса. Юныя парламентарыі ініцыіравалі сустрэчу з намеснікам старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці дырэктарам сярэдняй школы № 14 Маладзечна Калінай Віктараўнай Капуцкай, для таго каб яна адказала на пытанні моладзі і дала растлумачэнні.
Круглы стол “Дыялог на аднолькавых правах” адбыўся ў гімназіі № 6 Маладзечна, таму да абмеркавання важных для школьнікаў пытанняў запрасілі дырэктара Анжаліку Аляксандраўну Хандзецкую і лідараў гімназічнага самакіравання гэтай установы адукацыі.
Каліна Віктараўна пачала сустрэчу з аповеду пра тое, што сабой уяўляе Нацыянальны сход Рэспублікі Беларусь, якія функцыі ў дэпутатаў ніжняй і верхняй палаты, а таксама пра работу дэпутатаў на мясцовым узроўні.
Дзеці з вялікай цікавасцю ўключыліся ў дыялог. Удзельнікаў сустрэчы цікавіла, як будзе праходзіць цэнтралізаваны экзамен, ці будзе ён дыферэнцыравацца для навучэнцаў профільных і няпрофільных класаў, як зменяцца экзамены для дзевяцікласнікаў, чаму вяртаюць экзамен па прадмеце “Гісторыя Беларусі”, як будзе працаваць дыстанцыйнае навучанне, і многія іншыя пытанні.
Такая форма абмеркавання тэмы, як круглы стол, дазваляе моладзі весці дыялог на роўных з прадстаўнікамі дзяржаўнай улады, а такія сустрэчы даюць магчымасць маладым людзям не толькі задаць пытанні, якія іх хвалююць, але і трансліраваць сваё меркаванне па пытанні, якое абмяркоўваецца.
Паспяховая будучыня ў руках кожнага — да такой высновы прыйшлі ўдзельнікі круглага стала.
Настасся АГУРЦОВА,
метадыст Маладзечанскага цэнтра творчасці дзяцей і моладзі “Маладзік”.
