У міжнародным конкурсе “Мова без меж”, які праводзіўся ў дыстанцыйным фармаце з 9 лістапада па 25 снежня, перамагла настаўніца рускай мовы і літаратуры Сноўскай сярэдняй школы Нясвіжскага раёна Іна Рычардаўна Віннік. Журы асобна адзначыла конкурсную работу настаўніцы рускай мовы і літаратуры сярэдняй школы № 1 Скідзеля Наталлі Іванаўны Чаркес.
У спаборніцтвах прынялі ўдзел больш за 500 педагогаў з 11 краін свету (Грузіі, Арменіі, Беларусі, Малдовы, Азербайджана, Кыргызстана, Украіны і інш.). Яны былі арганізаваны ў межах гранта, што фінансуецца за кошт субсідый, выдзеленых на рэалізацыю мерапрыемстваў, накіраваных на развіццё рускай мовы, а таксама ведамаснай мэтавай праграмы “Навукова-метадычнае, метадычнае і кадравае забеспячэнне навучання рускай мове і мовам народаў Расійскай Федэрацыі”.
Па словах арганізатара конкурсу, старшыні навукова-адукацыйнага саюза “Роднае слова”, члена Савета па рускай мове пры Прэзідэнце Расійскай Федэрацыі Канстанціна Дзеравянкі, мэта конкурсу — абмен вопытам і ведамі, распаўсюджванне педагагічнага вопыту лепшых настаўнікаў рускіх школ краін СНД, павышэнне грамадскага і прафесійнага статусу настаўнікаў, выяўленне і падтрымка таленавітых педагогаў, якія валодаюць сучаснымі, у тым ліку аўтарскімі, методыкамі выкладання, што павышаюць матывацыю навучэнцаў да вывучэння рускай мовы і літаратуры.
Спаборніцтвы праходзілі ў два этапы. На першым этапе ўдзельнікі конкурсу прадстаўлялі візітную картку ў фармаце відэазвароту, эсэ на прапанаваную тэму (“Самае галоўнае, чаму я хачу навучыць дзяцей”, “Я магу зрабіць школу лепшай”, “Сакрэты прафесійнага поспеху”, “Малады настаўнік. Што далей?”, “Ці лёгка быць педагогам” і інш.), відэазапіс паказальнага ўрока працягласцю 10—20 мінут, дзе павінны быць фармулёўка тэмы ўрока, тлумачэнне новага матэрыялу, замацаванне (дарэчы, форма правядзення ўрока вызначалася ўдзельнікам самастойна з улікам магчымасцей рэгіёна ў сувязі з эпідэміялагічнай сітуацыяй), а таксама аўтарскія вучэбна-метадычныя матэрыялы, якія адлюстроўваюць заяўленую тэму. У залежнасці ад мэты, задач, якасці і значнасці конкурсная работа магла ўяўляць сабой распрацоўку ўрокаў і пазакласных мерапрыемстваў, метадычны дапаможнік, апісанне прыёмаў педагагічнай тэхнікі, дыдактычныя распрацоўкі, дыягнастычныя матэрыялы і інш. Работы ацэньваліся па такіх крытэрыях, як актуальнасць падыходаў да вырашэння задач выкладання на рускай мове, адпаведнасць зместу выбранай тэме, значнасць і разнастайнасць матэрыялаў, сістэмнасць работы па вырашэнні комплексу задач навучання, практычная каштоўнасць прадстаўленых матэрыялаў, эфектыўнасць прапаноўваемай методыкі, тэхналогіі.
Па выніках адборачнага этапу членамі журы былі вызначаны лепшыя конкурсныя работы, аўтары якіх атрымалі магчымасць прыняць удзел у фінале конкурсу — гэта 12 настаўнікаў. Сярод іх тры педагогі з Беларусі: Іна Рычардаўна Віннік, настаўніца рускай мовы і літаратуры Сноўскай сярэдняй школы Нясвіжскага раёна, Наталля Іванаўна Чаркес, настаўніца рускай мовы і літаратуры сярэдняй школы № 1 Скідзеля Гродзенскай вобласці, і Ларыса Генрыхаўна Лапкоўская, настаўніца рускай мовы і літаратуры мёрскай сярэдняй школы № 3 імя Героя Савецкага Саюза Я.А.Тамко.
На другім этапе конкурсу фіналісты ў рэжыме відэаканферэнц-сувязі прадставілі членам аргкамітэта і журы свае аўтарскія адукацыйныя тэхналогіі. Эксперты ў жывой гутарцы змаглі задаць пытанні канкурсантам, ацаніць іх выступленні і вызначыць пераможцу. За кожнае конкурснае заданне налічваліся балы, а пераможцу вызначалі па іх колькасці. Дарэчы, журы мела права выставіць дадатковыя балы за арыгінальную ідэю і крэатыўнасць пры апісанні і прэзентацыі методыкі.
— Ідэя правядзення конкурсу актуальная і своечасовая. Было прадстаўлена шмат творчых, цікавых праектаў з выкарыстаннем разнастайных метадаў і прыёмаў, якія садзейнічаюць развіццю творчага патэнцыялу вучняў, якаснаму асваенню практычных навыкаў. Усе работы вельмі розныя па форме, структуры і змесце, цяжка было ацаніць талент, працу творчых людзей, — адзначыла старшыня аргкамітэта конкурсу, кандыдат педагагічных навук, вядучы навуковы супрацоўнік Федэральнага інстытута развіцця адукацыі РАНГіДС Наталля Авалуева.
Па выніках конкурсных выпрабаванняў пераможцай спаборніцтваў аднадушна была прызнана Іна Віннік.
— На конкурс я прадставіла апісанне сістэмы арганізацыі навукова-даследчай дзейнасці навучэнцаў “НИ Дня без НИД”. На працягу 20 гадоў я займаюся гэтым пытаннем. У рабоце знайшлі адлюстраванне ўрокі фарміравання даследчыцкіх кампетэнцый школьнікаў, супрацоўніцтва з УВА, фрагменты калектыўнага партфоліа, дзе размешчаны дыпломы, фотаздымкі дзяцей, якія перамаглі ў канферэнцыях і конкурсах даследчай дзейнасці, статыстыка з 2002 года (114 маіх выхаванцаў удзельнічалі ў конкурсах даследчай дзейнасці і заваявалі 99 дыпломаў), спектр канферэнцый, у якіх мы прымалі ўдзел. Я напісала эсэ на тэму “Самае галоўнае, чаму я хачу навучыць дзяцей”. Таксама быў адзняты і прадстаўлены на суд журы ўрок развіцця мовы ў 11 класе на тэму “Выразныя магчымасці марфалогіі” — па фарміраванні эмацыянальнага інтэлекту, — расказвае Іна Рычардаўна. — Гэта быў мой 41-шы конкурс і 36-я перамога. Шчыра скажу, што ў снежні з-за няпростай эпідэміялагічнай абстаноўкі і заканчэння чвэрці мне фізічна было вельмі складана ўдзельнічаць у ім. І калі б не мой характар, мабыць, адмовілася б. Перамога не была чакаемай. Усе ўдзельнікі — дастойныя канкурэнты, моцныя сапернікі. Я добра ведаю беларускіх калег, цудоўных настаўнікаў Ларысу Генрыхаўну Лапкоўскую, Наталлю Іванаўну Чаркес, неаднаразова ўзаемадзейнічала з некаторымі замежнымі педагогамі. Больш моцныя эмоцыі адчула, калі выйшла менавіта ў фінал. Я вельмі ўдзячна маім вучням за дапамогу і падтрымку. Дарэчы, журы ўразілі мае ўзаемаадносіны з дзецьмі на ўроку, што вельмі прыемна.
Перамога ў конкурсе — гэта добры прыклад як для маіх калег, так і для вучняў. Бо мы іх заахвочваем удзельнічаць у алімпіядах, конкурсах і іншых мерапрыемствах. Удзел і перамога ў конкурсе далі ўсведамленне таго, што я, навучаючы дзяцей, іду правільным шляхам, і натхнілі мяне на новыя пачынанні.
Пераможцу конкурсу чакае імянны дыплом і грашовы прыз. Фіналісты спаборніцтваў будуць узнагароджаны дыпломамі лаўрэатаў і каштоўнымі падарункамі.
Наталля КАЛЯДЗІЧ.