Лагер для школьнікаў, зацікаўленых у IT і тэхнічнай творчасці, у гэтым годзе збірае падлеткаў з Магілёўскай вобласці. Заяўкі прымаюцца да 17 ліпеня.
Junior Ignite Camp пройдзе з 8 па 17 жніўня. Каля тыдня школьнікі будуць працаваць у камандах над уласнымі стартапамі, каб у канцы змены прэзентаваць свае распрацоўкі патэнцыяльным інвестарам.
Як і ў мінулыя гады, навучэнцы будуць наведваць заняткі па праграмаванні і робататэхніцы, а таксама развіваць навыкі камунікацыі і кіравання праектамі. Лагер дае яшчэ і добрую магчымасць папрактыкавацца ў англійскай мове — нават фінальныя пітчы стартапаў будуць праходзіць па-англійску. Акрамя насычанай адукацыйнай праграмы, школьнікаў чакаюць майстар-класы, экскурсіі, спартыўныя спаборніцтвы, творчыя конкурсы і віктарыны.
Стаць удзельнікам Junior Ignite Camp можа любы школьнік 12—14 гадоў з Магілёўскай вобласці. Неабходна толькі запоўніць анкету на сайце асацыяцыі “Адукацыя для будучыні” edu4future.by і расказаць пра свой вопыт знаёмства з робататэхнікай і праграмаваннем, а пасля прайсці сумоўе.
Удзел у праекце для тых, хто пройдзе адбор, цалкам бясплатны.
Падрыхтавала Мар’я ЯНКОВІЧ.
