Дасягнуць больш якаснага ўзроўню грамадзянска-патрыятычнага выхавання моладзі — цяпер гэта адна з прыярытэтных задач ва ўстановах адукацыі Магілёўшчыны.
— Неабходнасць выхавання ў моладзі патрыятычных пачуццяў сёння набывае асаблівае значэнне. І важна, што ва ўстановах адукацыі вобласці склалася свая сістэма грамадзянска-патрыятычнага выхавання, якая рэалізуецца ў рамках адукацыйнага працэсу і з’яўляецца важным яго складнікам. Але мы разумеем, што ў сучасных рэаліях выхаваўчай рабоце патрэбны нейкія новыя імпульсы, новыя формы. Каб не згубіць маладое пакаленне, у гэтую дзейнасць пастаянна ўкараняюцца новаўвядзенні, якія адпавядаюць часу, — расказала намеснік начальніка галоўнага ўпраўлення па адукацыі Магілёўскага аблвыканкама І.М.Кускова.
У сучасных рэаліях выхаваўчай рабоце патрэбны нейкія новыя імпульсы, новыя формы.
У гэтым навучальным годзе самым адметным такім новаўвядзеннем стала стварэнне абласнога патрыятычнага цэнтра. Ён быў адкрыты ў пачатку верасня на базе Магілёўскага абласнога кадэцкага вучылішча імя Я.М.Нікалаенкі.
Дарэчы, абласны патрыятычны цэнтр размясціўся ў кадэцкім вучылішчы невыпадкова. Навучальная ўстанова носіць імя Героя Савецкага Саюза генерал-лейтэнанта авіяцыі Яўгена Нікалаенкі.
— Патрыятызмам у нас у літаральным сэнсе прасякнуты нават сцены. У вучылішчы сёння навучаецца 171 кадэт. І з упэўненасцю магу сказаць, што кожны з іх сапраўдны патрыёт. Кадэты ведаюць аб подзвігах героя, імя якога носіць наша ўстанова адукацыі. Яны наогул добра ведаюць гераічнае мінулае беларускага народа. І гэта вельмі важна. Гісторыю нельга забываць, бо на наглядных прыкладах мы бачым, да чаго гэта прыводзіць. Кадэты не проста захоўваюць і берагуць гістарычную памяць, але і расказваюць пра яе аднагодкам, матывуючы іх рабіць тое ж самае, — паведаміў кіраўнік абласнога патрыятычнага цэнтра В.У.Ермакоў.
Па яго словах, пакуль заняткі ў цэнтры праводзіліся ў шосты школьны дзень для магілёўскіх школьнікаў, навучэнцаў 7—10 класаў. Кадэты самі расказвалі падлеткам пра асаблівасці свайго вучылішча, праводзілі для іх экскурсіі па навучальнай установе, па памятных месцах у ваколіцах Магілёва, дзе ў гады Вялікай Айчыннай вайны здзяйснялі подзвігі абаронцы Радзімы. Акрамя гэтага, для юнакоў арганізоўваліся заняткі па дапрызыўнай падрыхтоўцы, падчас якіх яны знаёміліся са стралковым узбраеннем.
— На занятках мы імкнёмся да таго, каб навучэнцы выразна ўсвядомілі каштоўнасць сённяшняга мірнага неба. Гэта найлепшым чынам фарміруе патрыятычныя пачуцці. Хлопцы пачынаюць разумець, што яны — будучыя абаронцы краіны, — падкрэсліў В.У.Ермакоў.
Зараз пэўныя карэктывы ў арганізацыю заняткаў у абласным патрыятычным цэнтры ўнесла пандэмія. Аднак заняткі не спыняцца, прапрацоўваецца магчымасць іх правядзення ў дыстанцыйным фармаце. Больш за тое, у вучылішчы спадзяюцца, што ў найбліжэйшы час вучэбна-выхаваўчыя заняткі пачнуць праводзіць і для вучняў сельскіх школ.
— Плануем з наступнага года пачаць арганізоўваць і больш працяглыя па часе заняткі. Гэта будзе не аднадзённы заезд, а пражыванне ў вучылішчы як мінімум тыдзень, што дазволіць юнакам акунуцца ў кадэцкае жыццё, дасканала азнаёміцца з нашым побытам. Абавязковым для іх будзе вывучэнне асноў ваеннай справы, страявыя заняткі, наведванне воінскіх часцей, экскурсіі патрыятычнай накіраванасці, — адзначыў дырэктар Магілёўскага абласнога кадэцкага вучылішча Ю.А.Грышанаў.
Адметна, што абласны патрыятычны цэнтр таксама будзе забяспечваць усебаковае метадычнае суправаджэнне кіраўнікоў па ваенна-патрыятычным выхаванні ўсіх школ вобласці. А ўвогуле галоўная мэта цэнтра — стаць вядучым суб’ектам рэгіёна ў арганізацыі мэтанакіраванага патрыятычнага выхавання падрастаючага пакалення.
Ганна СІНЬКЕВІЧ.
Фота аўтара.
