Кіраўнік WADA перавыбраны на новы тэрмін

Прэзідэнт Сусветнага антыдопінгавага агенцтва (WADA) Крэйг Рыдзі перавыбраны на новы трохгадовы тэрмін у ходзе пасяджэння савета заснавальнікаў гэтай арганізацыі ў Глазга. Адпаведная інфармацыя размешчана на афіцыйным сайце WADA, паведамляе БелТА.

Брытанец Крэйг Рыдзі ўзначальвае Сусветнае антыдопінгавае агенцтва з 2013 года. Віцэ-прэзідэнтам выбрана міністр спорту Нарвегіі Лінда Хелеланд. За апошні час арганізацыя не аднойчы знаходзілася ў цэнтры ўвагі СМІ і крытыкавалася. Сярод найбольш гучных спраў, звязаных з WADA, — забарона на ўжыванне мельдонію.

Сусветнае антыдопінгавае агенцтва прадоўжыць узмоцненую барацьбу з допінгам у спорце і плануе атрымаць права пазбаўляць краіны, якія не адпавядаюць кодэксу агенцтва, магчымасці правядзення вялікіх турніраў, такіх як Алімпійскія гульні і чэмпіянаты свету. Старшыня камітэта ў адпаведнасці з кодэксам WADA канадзец Рэнэ Бушар адзначыў, што ў агенцтва недастаткова паўнамоцтваў і, акрамя пазбаўлення краін міжнародных турніраў, прапаноўваецца ўключыць сістэму штрафаў для нацыянальных антыдопінгавых агенцтваў і міжнародных федэрацый, калі яны не могуць справіцца з праблемамі па ўжыванні забароненых прэпаратаў.

У Глазга на пасяджэнні савета заснавальнікаў агенцтва таксама ўдакладнілі тэрміны апублікавання другой часткі даклада аб допінгу ў спорце незалежнай камісіі WADA Рычарда Макларэна, першая частка якога была абнародавана 18 ліпеня ў Таронта. Гэта адбудзецца 9 снежня, на наступны дзень пасля пасяджэння выканкама Міжнароднага алімпійскага камітэта.