Конкурс “Лепшы памочнік выхавальніка” арганізавалі ў дашкольным цэнтры развіцця дзіцяці № 1 Астраўца.
На першым этапе конкурсу памочнікамі выхавальнікаў была прадстаўлена сервіроўка дзіцячага стала. Журы ацэньвала эстэтыку афармлення, адпаведнасць узросту дзяцей. Вельмі прыемна было бачыць, як выхаванцы дапамагалі Валянціне Баляславаўне Кацінель сервіраваць стол. Хочацца адзначыць памочніка выхавальніка Алену Іосіфаўну Тумко, якая сервіравала стол да Дня Святога Валянціна. Алена Антонаўна Мілько сервіравала стол у адпаведнасці з порамі года — зімой і вясной, а таксама асобна для хлопчыкаў і дзяўчынак. Ірына Аляксандраўна Анушкевіч прадставіла абарону сваёй сервіроўкі ў вершаванай форме, а стол сервіравала ў выглядзе снегавіка.
У чарговым этапе, у якім памочнікам выхавальніка неабходна было прадэманстраваць уменні работы з дзецьмі, спалучаючы гэта са сваім хобі, лепшай была А.І.Тумко, якая разам з выхаванцамі паказала майстар-клас “Пчолка-працаўніца”. Алена Іосіфаўна на 15 мінут пагрузіла дзяцей у свет пчол: расказала, дзе яны жывуць і якую карысць прыносяць людзям, а таксама аб відах і карысці мёду. Вольга Уладзіміраўна Паўлюшчык пад вясёлую песню прадэманстравала з дзецьмі комплекс гімнастычных практыкаванняў.
Да заключнага этапу конкурсу ўдзельніцы падрыхтавалі візітоўкі, у якіх расказалі пра сябе, свае інтарэсы, а таксама ўвазе журы і глядзельнай залы прадставілі самастойна распрацаваны дызайн спецадзення памочніка выхавальніка з каментарыямі па яго выкарыстанні ў працы.
Конкурс паказаў, што нашы памочнікі выхавальнікаў вылучаюцца творчым падыходам, крэатыўнасцю, валодаюць навыкамі дызайнерскага майстэрства і, самае галоўнае, з’яўляюцца прафесіяналамі сваёй справы. У выніку пераможцай конкурсу “Лепшы памочнік выхавальніка” стала А.І.Тумко, сярод пераможцаў таксама В.У.Паўлюшчык, В.Б.Кацінель, А.А.Мілько.
На нашым сайце было абвешчана анлайн-галасаванне, у якім маглі прыняць удзел бацькі выхаванцаў. Пераможцай галасавання стала памочнік выхавальніка В.Б.Кацінель. Усім удзельніцам конкурсу былі ўручаны граматы і памятныя падарункі.
Алена ВАСІЛЬЧЫК,
загадчыца дашкольнага цэнтра развіцця дзіцяці № 1 Астраўца.