Сёлета выпускнікі школ будуць здаваць Адзінае нацыянальнае тэсціраванне ў новым фармаце: спачатку экзамены ў школах, а потым тэсціраванне пры паступленні ў ВНУ. Міжнароднае інфармацыйнае агенцтва Казінфарм падрыхтавала падборку асноўных навін АНТ.
Усе выпускныя экзамены пройдуць у школах па месцы навучання. Заданні складаюцца Міністэрствам адукацыі і навукі. Адказы будуць правярацца створанымі ў саміх школах экзаменацыйнымі камісіямі, яны ж і будуць ставіць адзнакі. Арыенціровачныя тэрміны — 29 мая — 9 чэрвеня 2017 года.
У 2017 годзе чакаецца ўдзел у тэсціраванні 151 тысячы чалавек (у тым ліку 91 тысяча (70%) — выпускнікі школ і 60 тысяч — выпускнікі каледжаў). У гэтым годзе ў жадаючых паступіць у ВНУ з’явілася магчымасць на 120 пытаннях зарабіць 140 балаў. Ацэнка адказаў: у заданнях з выбарам аднаго правільнага адказу прысуджаецца альбо 1 бал, альбо 0 балаў. У выпадку, калі прапануецца некалькі адказаў, за ўсе правільныя — 2 балы, за адну памылку — 1 бал, за дзве і больш памылак — 0 балаў. Прахадны бал — 50 балаў, але ў нацыянальныя ВНУ вышэйшы — 65 балаў. Таксама павялічаны парог для некаторых спецыяльнасцей: “Адукацыя”, “Сельскагаспадарчыя навукі” і “Ветэрынарыя” — 60 балаў. Уладальнікі знака “Алтын Белгі”, пераможцы і прызёры рэспубліканскіх і міжнародных алімпіяд будуць здаваць тэсціраванне на агульных падставах. Адзіная перавага — права на грант пры аднолькавых балах з выпускнікамі, якія не маюць пералічаных узнагарод.
Сёлета былі ўнесены змены і ў комплекснае тэсціраванне абітурыентаў для выпускнікоў каледжаў, якія жадаюць паступіць у ВНУ. Цяпер яны змогуць выбіраць паміж двума відамі тэсціравання. Першы — для тых, хто паступае ў ВНУ адразу на 2 або на 3 курс (па скарочанай праграме), другі — для тых, хто паступае на спецыяльнасці, не роднасныя той, што была ў каледжы. Для другой катэгорыі выпускнікоў фармат тэсціравання па тэхналогіі і змесце ідэнтычны з АНТ.
Па выніках АНТ выдаецца сертыфікат, сапраўдны да 31 снежня бягучага года. Узоры заданняў выніковай атэстацыі, пералік профільных прадметаў, вучэбна-метадычныя дапаможнікі для падрыхтоўкі да АНТ можна знайсці на сайце Нацыянальнага цэнтра тэсціравання www.testcenter.kz. Таксама на сайце даступна платнае пробнае тэсціраванне.
Акрамя таго, на старонках газеты “Егемен Казахстан” публікуюцца заданні па пісьменнасці чытання, матэматычнай пісьменнасці, варыянты і рашэнні задач іншых прадметаў АНТ. Тыя, хто не змог набраць з першай спробы парогавы бал, могуць пераздаць тэсціраванне яшчэ два разы: спачатку ў жніўні, а ў выпадку паўторнай няздачы абітурыенты могуць паступіць у ВНУ ўмоўна і здаць АНТ трэці раз у студзені наступнага года.
