Пачуць людзей і дапамагчы

Правядзенне прамых ліній дае магчымасць грамадзянам атрымаць непрадузятае меркаванне аб сваёй праблеме. Такое меркаванне выказаў старшыня Камітэта дзяржаўнага кантролю Леанід Анфімаў, каменціруючы вынікі прамой тэлефоннай лініі з жыхарамі Новалукомля.

“Як правіла, людзі звяртаюцца з аналагічнымі пытаннямі па жыццёвых праблемах. Многія хочуць паразмаўляць з новым чалавекам, каб пачуць свежае непрадузятае меркаванне наконт сваёй праблемы”, — канстатаваў Леанід Анфімаў.

Кіраўнік ведамства адзначыў, што часта ў аснове меркавання некаторых грамадзян наконт таго ці іншага пытання суб’ектыўная ацэнка сітуацыі. “Часцей за ўсё, калі потым пачынаеш правяраць, аказваецца, доля ісціны ёсць, але ўсё ж праблема не настолькі вострая, як яе спрабуюць паказаць”, — дадаў старшыня КДК.

Усяго на прамую лінію звярнулася каля 10 чалавек, у асноўным — жыхары Новалукомля. Былая работніца Новалукомскай ДРЭС, якая пражывае на вул. Набярэжная, закранула пытанне ямачнага рамонту і паўнаты правядзення капрамонту шматкватэрнага дома. Іншыя пыталіся аб магчымасці набыцця жылля па льготным крэдыце для мнагадзетнай сям’і, хвалявала праблема спальвання смецця каля вёскі Стражавічы, былі пытанні па дзейнасці мясцовага гаражна-будаўнічага кааператыва. Даручэнне разабрацца з гэтымі зваротамі атрымалі прадстаўнікі мясцовых органаў улады. Іх выкананне ўзята на кантроль КДК па Віцебскай вобласці. Узнятыя пытанні аб высокіх цэнах на лякарствы і прапанову абмежаваць скорасны рэжым у населеных пунктах з гравійным пакрыццём старшыня КДК паабяцаў перанакіраваць у адпаведныя міністэрствы.

Акрамя таго, Леанід Анфімаў наведаў ААТ “Завод керамзітавага гравію г.Новалукомль”, дзе азнаёміўся з выпускам інавацыйнай прадукцыі, асвоенай у выніку рэалізацыі вялікага інвестпраекта коштам 9 млн еўра. Рашэнне азнаёміцца з гэтай вытворчасцю кіраўнік ведамства прыняў у сувязі з яго значнасцю для Чашніцкага раёна — гэта горадаўтваральнае прадпрыемства, на якім занята каля 300 чалавек.