Цёплая пара года падышла да канца, і восень неахвотна аддае апошняе летняе цяпло. Гэтым і скарысталіся мы з навучэнцамі, арганізаваўшы ў школе ў суботу 8 кастрычніка мерапрыемства “Спартыўнае арыентаванне”.
У гульні ўдзельнічалі тры каманды па 6 чалавек. Перш за ўсё кожная з іх паказала, наколькі добра ўдзельнікі ведаюць тапаграфічныя знакі на этапе «Чытанне тапаграфічнай карты». На наступным этапе – «Блуканне па азімутах» – каманды павінны былі прайсці маршрут з дапамогай компаса – для кожнай каманды асобны. Самай відовішчнай часткай гульні стала пераадоленне турыстычнай паласы перашкод! Тут эмоцыі праяўляліся найбольш ярка: праслізнуць праз «павуцінне», пераадолець «грэблю», пераправіцца праз умоўны роў з дапамогай «ківача», прайсці «балота» па «купінах» і г.д. Школьны сад ператварыўся ў палігон спартыўнага спаборніцтва!
Кожная каманда максімальна праявіла сябе ў кожным з трох этапаў. Каманда пад капітанствам Аляксея Патапенкі апынулася лепшай у арыентаванні па компасе. Каманда Хрысціны Чвыровой, якая складалася толькі з дзяўчынак, стала самай абаяльнай, але выніковую перамогу па выніках усіх трох этапаў атрымала каманда Уладзіслава Барысава. Напрыканцы мерапрыемства задаволеныя і шчаслівыя ўдзельнікі гульні падзякавалі адзін аднаму за ўдзел і сумленнае суперніцтва і вырашылі, што першае вясновае цяпло сустрэнуць таксама весела, як праводзілі мінулае лета.
Ганна ЕЎДАКІМЕНКА,
настаўніца геаграфіі Мотневіцкага ясляў-сада – базавай школы.
