Ідэолагі павінны ўмець дыскутаваць на вострыя тэмы, адстойваць свой пункт гледжання. Такое меркаванне выказаў доктар гістарычных навук прафесар філасофіі Брэсцкага дзяржаўнага ўніверсітэта імя А.С.Пушкіна Барыс Ляпешка, каменціруючы “Вялікую размову з прэзідэнтам”.
“Мне вельмі спадабаліся разважанні прэзідэнта аб ідэалогіі. Ён цалкам мае рацыю ў частцы крытыкі стану спраў у гэтай сферы. На жаль, гэтая тэма фактычна цалкам сышла са старонак газет, але ж ідэалогія з’яўляецца адным з важных кампанентаў інфармацыйнай бяспекі. Не трэба баяцца вострых тэм, выказваць альтэрнатыўны пункт гледжання: ідэалогіі без гэтага не бывае. Ідэалогія заўсёды мае на ўвазе дыскусійныя, спрэчныя пытанні, іх абмеркаванне, вастрыню, нетрывіяльнасць, антыдагматызм. Адыход ад гэтага — пройгрышная пазіцыя”, — лічыць прафесар.
Любы аспект жыццядзейнасці мае ідэалагічны складнік, гэта тычыцца ўсіх сфер: ад эканомікі — да спорту. “Цалкам правільна гаворыць прэзідэнт, што пасля перамогі спартсмена ўся краіна радуецца, у людзей добры настрой, яны з задавальненнем абмяркоўваюць гэтую тэму. Хіба гэта не ідэалогія? Тое ж самае тычыцца і эканамічных пытанняў… Як адзначыў кіраўнік дзяржавы, трэба размаўляць з людзьмі”, — перакананы Барыс Ляпешка.
На яго думку, ідэалогія і нацыянальная ідэя — узаемазвязаныя паняцці. “Чамусьці склаўся такі пункт гледжання, што сапраўдная роля інтэлігенцыі — апаніруючая, але гэта зусім не так. Галоўная роля заключаецца ў тым, каб развіваць нейкія ідэі. На сустрэчы ўзнімалі тэму нацыянальнай самаідэнтыфікацыі. Гэта правільна: трэба сябе спачатку ўсвядоміць, а потым ужо весці гаворку пра нейкую ідэю, якая аб’ядноўвае грамадства. У нас яна пакуль не выкрышталізавалася па адной прычыне: грамадства не выспела. І не трэба саромецца пра гэта гаварыць, выхоўваць, фарміраваць уласную эліту”, — рэзюмаваў суразмоўнік.