Візуалізацыя — важны інструмент на ўроку, які спрыяе лепшаму засваенню інфармацыі навучэнцамі. Сёння мы разгледзім адну з яе мадэлей — стужку часу.
Стужка часу, або таймлайн (англ. timeline), — гэта шкала, на якую ў храналагічнай паслядоўнасці наносяцца падзеі. Такім чынам атрымліваем наглядную гісторыю развіцця асобы, эпохі, навукі, краіны і г.д.
Да з’яўлення камп’ютараў і адпаведнага праграмнага забеспячэння стужкі часу часцей за ўсё рабілі з паперы: некалькі лістоў у клетку са сшытка падклейвалі так, каб атрымалася стужка. Унізе малявалі гарызантальную лінію з разметкамі па гадах або перыядах з указаннем падзей, якія адбываліся. Сучасны спосаб прадстаўлення стужкі часу — электронныя спісы або табліцы з пералічанай храналогіяй.
Выкарыстоўваць стужку часу можна на любым прадмеце, звязаным з храналогіяй: у якасці задання для самастойнай работы вучняў па вывучэнні якога-небудзь храналагічнага працэсу; для складання стужак планавання падзей; складання біяграфій знакамітых людзей; складання асабістай біяграфіі ці гісторыі сваёй сям’і; складання партфоліа ў выглядзе таймлайна; арганізацыі сумеснай распрацоўкі вучэбнага задання.
Я выкарыстоўваю гэты метад візуалізацыі на ўроках беларускай літаратуры.
Так, у выглядзе стужкі часу можна прадставіць жыццёвы шлях пісьменнікаў і паэтаў; развіццё падзей у творы на працягу пэўнага прамежку часу; раскрыццё літаратурнага персанажа, калі ў творы ён згадваецца даволі доўгі час, і г.д.
Стужка часу на ўроках роднай літаратуры дапамагае ўсталяваць міжпрадметныя сувязі: на пазначаны жыццёвы шлях пісьменніка дадаюцца важныя гістарычныя падзеі, якія паўплывалі на яго станаўленне, падзеі са свету мастацтва, таксама можна дапоўніць стужку важнымі навуковымі адкрыццямі, якія прыйшліся на той перыяд. Дзякуючы такім варыянтам выкарыстання стужкі часу, у навучэнцаў складваецца цэласная карціна свету.
У сваёй практыцы выкарыстоўваю стужкі часу для вывучэння ролі Ефрасінні Полацкай, Францыска Скарыны, Міколы Гусоўскага ў гісторыі беларускай літаратуры. Напрыклад, у 9 класе пры вывучэнні твора “Жыціе Ефрасінні Полацкай” пры дапамозе шкалы часу навучэнцы знаёмяцца з асноўнымі этапамі біяграфіі святой падзвіжніцы, жыцця і творчасці класікаў Янкі Купалы, Якуба Коласа, Максіма Багдановіча, сучасных пісьменнікаў Івана Шамякіна, Юрася Свіркі, Васіля Быкава, тым самым пашыраюць свае веды не толькі па беларускай літаратуры, але і па гісторыі краіны.
Бясспрэчны плюс стужкі часу — яе можна стварыць на спецыяльных сайтах, не прыкладаючы асаблівых намаганняў. Сучасныя распрацоўкі дазваляюць дадаваць на стужку часу ўсё: ад тэксту да малюнкаў, відэа і гуку.
Выкарыстоўваючы стужку часу ў сваёй практыцы, я прыйшла да наступных высноў: увядзенне гэтага прыёму візуалізацыі ў адукацыйны працэс — неабходнасць сучаснасці; яна спрыяе захопленасці дзяцей, павышае здольнасць аналізаваць матэрыял і ўстанаўліваць прычынна-выніковыя сувязі; выкарыстанне гэтага прыёму спрыяе лепшаму засваенню навучэнцамі складанага і аб’ёмнага матэрыялу; створаныя стужкі часу па розных вучэбных дысцыплінах дазваляюць настаўнікам аблегчыць успрыманне матэрыялу навучэнцамі.
Госць з высокага неба
Звернемся да тэмы “Госць з высокага неба”. Жыццёвы і творчы шлях Максіма Багдановіча. Вершы “Песняру”, “Кніга”, “Жывеш не вечна, чалавек…”, “Я хацеў бы спаткацца з Вамі на вуліцы…”.
Мэта ўрока: аднавіць, пашырыць, паглыбіць і сістэматызаваць веды вучняў пра жыццё, творчасць, асобу паэта Максіма Багдановіча; развіваць культуру вуснага і пісьмовага маўлення; садзейнічаць выяўленню індывідуальных адносін да асобы паэта.
Задачы: стварыць умовы для фарміравання і развіцця ўмення працаваць з тэкстам; аналізаваць, структураваць і параўноўваць інфармацыю; выказваць і аргументаваць свае думкі; садзейнічаць выхаванню эмпатыі, асуджэння эстэтычнай неразвітасці, чэрствасці і абыякавасці.
Абсталяванне: вучэбны дапаможнік па беларускай літаратуры для 10 класа; вершы “Песняру”, “Кніга”, “Жывеш не вечна, чалавек…”, “Я хацеў бы спаткацца з Вамі на вуліцы…”; фотаздымкі Максіма Багдановіча.
Эпіграф:
…Песняй абвостраны слых,
Чуеш, Максім? — не ўмірае!
Гэта з табой. І для ўсіх
Зорка Венера світае.
Я.Янішчыц
У пачатку ўрока ціха гучыць раманс “Зорка Венера”. Праблемнае пытанне, якое выносіцца настаўнікам на абмеркаванне: “Як вы думаеце, Максім Багдановіч — гэта сапраўды “госць з высокага неба?”.
Настаўнік. Кожны з вас, я думаю, углядаўся ў чыстае зорнае неба. Хтосьці шукаў сузор’е, хтосьці ўглядаўся, каб пабачыць сваю знічку і загадаць жаданне, а хтосьці проста любаваўся зорным небам. А давайце глянем на зорны літаратурны небасхіл. Яркімі зоркамі там гараць у дзівосным сузор’і імёны Ф.Скарыны, Е.Полацкай, Ф.Багушэвіча, Янкі Купалы, Якуба Коласа, і, вядома, мы не можам не заўважыць вялікую светлую прыгожую зорку, якая ўзышла 9 снежня 1891 года, бо ў гэты час у Мінску ў сям’і настаўнікаў нарадзілася дзіця, будучая зорка беларускай культуры. Я спадзяюся, вы зразумелі, што сёння на ўроку мы будзем гаварыць пра жыццё, творчасць, асобу паэта Максіма Багдановіча. Больш падрабязна спынімся на яго вершах “Песняру”, “Кніга”, “Жывеш не вечна, чалавек…”, “Я хацеў бы спаткацца з Вамі на вуліцы…”. Спадзяюся, што напрыканцы ўрока вы зможаце запомніць (2—4) факты з біяграфіі Максіма Багдановіча; абгрунтаваць жанр твораў; прааналізаваць тэматыку, праблематыку, будову вершаваных твораў; адказаць на праблемнае пытанне.
Настаўнік прапануе звярнуцца да стужкі часу. На ёй размешчаны вызначальныя даты ў біяграфіі Максіма Багдановіча. Абапіраючыся на веды па гісторыі, вучням трэба назваць падзеі, якія змянілі жыццё ўсёй краіны, і як яны паўплывалі на біяграфію паэта.
Усяго 25 гадоў доўжыўся зямны век М.Багдановіча. У маі 1917 года патухла яго апошняя, тоненькая і пахілая свечка жыцця. Побач не было ні сваякоў, ні сяброў, і выпадковыя людзі, якія пахавалі ў крымскай камяністай зямлі спакутаванага ад хваробы маладога хлопца, не здагадваліся нават, што праводзілі ў апошні шлях выдатнага беларускага паэта. Якой жа “высокаю красою” трэба было валодаць, якую мець сілу, каб незадоўга да смерці ў сваім апошнім вершы так несамотна і светла напісаць пра зробленае ім для краіны, для свайго народа:
Ў краіне светлай, дзе я ўміраю,
У белым доме ля сіняй бухты,
Я не самотны, я кнігу маю
3 друкарні пана Марціна Кухты.
М.Багдановіч памёр, але ён жыве. Жыве ў ахвярным служэнні Бацькаўшчыне, жыве ў мудрых думках, высакародных пачуццях, жыве ў вершах і музыцы да іх. Якім жа быў М.Багдановіч як чалавек, паэт? Паспрабуем глыбей спасцігнуць асобу Багдановіча, намаляваць яго вобраз у сваім уяўленні, звярнуўшыся найперш да старонак біяграфіі, творчасці, помнікаў, успамінаў сучаснікаў. Паспрабуем асэнсаваць месца паэта ў нашым часе, у жыцці кожнага з нас. У “Вянок” Максіму вучні ўплятаюць свае шчырыя выказванні пра паэта, якія ідуць з глыбіні сэрца.
Лірыка М.Багдановіча не аднапланавая, яна разнастайная, як і ўсё яго жыццё. У паэта не знойдзеш і двух вершаў, якія б супадалі ў рытміка-інтанацыйным малюнку. Звернемся да яго паэзіі. Асноўныя тэмы творчасці паэта: мастацтва; Радзіма; таленавітасць беларускага народа; філасофская лірыка; каханне.
Работа ў групах.
1-я група.
Тэме мастацтва прысвечаны верш “Песняру” Максіма Багдановіча. Вучням прапаноўваецца паразважаць на гэтую тэму, выказаць свае адносіны да мастацтва.
2-я група.
Мой родны кут, як ты мне мілы,
Забыць цябе не маю сілы!
Не раз, утомлены дарогай,
Жыццём вясны мае убогай,
К табе я ў думках залятаю
І там душою спачываю.
О, як бы я хацеў спачатку
Дарогу жыцця па парадку
Прайсці яшчэ раз, азірнуцца,
Сабраць з дарог каменні тыя,
Што губяць сілы маладыя, —
К вясне б маёй хацеў вярнуцца.
Настаўнік. Ці пагаджаецеся вы са словамі Якуба Коласа? Падмацуйце гэтыя радкі вершам “Мяжы” М.Багдановіча.
3-я група.
Сэнс чалавечага жыцця для Багдановіча — у высокай духоўнасці асобы, у развіцці яе творчых сіл, у авалодванні багаццямі чалавечай культуры. Як паэт-філосаф, гуманіст выступаў М.Багдановіч у вершы “Я хацеў бы спаткацца з Вамі на вуліцы…”. Вызначце тэму верша, галоўную думку. Ці актуальны верш сёння? Абгрунтуйце свае меркаванні.
Напрыканцы ўрока клас звяртаецца да праблемнага пытання: “Максім Багдановіч — гэта сапраўды “госць з высокага неба?”. Вершы напісаны сто гадоў назад. Жыццё беларусаў з таго часу значна змянілася. Ці актуальныя праблемы, узнятыя ў творах, сёння? Вучні прыводзяць прыклады.
У якасці дамашняга задання дзецям можна прапанаваць прачытаць вершы У.Дубоўкі “О Беларусь, мая шыпшына”, “Залатая асенняя раніца”, “Родная мова, цудоўная мова!”.