Мастацтва валодае неверагоднай сілай. Яно хвалюе, выхоўвае, прымушае задумвацца і пабуджае да дзеянняў. Сіла мастацтва выкарыстоўваецца і для экалагічнага выхавання дзяцей. Менавіта такая ідэя ляжыць у аснове конкурсу “Зялёная планета”, які штогод праводзіцца ў Барысаўскім раёне.
“Зялёная планета” — гэта конкурс творчых работ, які вучыць дзяцей беражліва ставіцца да навакольнага асяроддзя, дапамагае фарміраваць у іх экалагічную дасведчанасць і патрыятызм. Праводзіцца конкурс Барысаўскім цэнтрам экалогіі і турызму.
— Сёння вялікая частка насельніцтва Беларусі пражывае ў гарадах і часта людзі не ўсведамляюць, якая велізарная біяразнастайнасць нас акружае. Менавіта прыцягненню ўвагі да таго, наколькі важна захаваць для будучых пакаленняў відавую разнастайнасць жывога свету, і прысвечаны наш конкурс, таму што любіць і абараняць можна толькі тое, што ты добра ведаеш, — расказвае дырэктар Барысаўскага цэнтра экалогіі і турызму Анжэла Валер’еўна Журавель.
Узяць удзел у конкурсе маглі навучэнцы ўсіх ступеняў агульнай сярэдняй адукацыі, устаноў дадатковай адукацыі, а таксама педагогі, зацікаўленыя ў развіцці экалагічнай адукацыі і асветы сярод насельніцтва. Установы адукацыі Барысаўскага раёна прадставілі па тры лепшыя работы ў кожнай намінацыі. У выніку на раённы конкурс было заяўлена каля ста работ, з якіх журы выбірала лепшых.
Дзецям і дарослым прапаноўваліся тры конкурсныя намінацыі. У намінацыі “Свет навокал” удзельнікі прадстаўлялі малюнкі, якія адлюстроўвалі ўзаемасувязь жывых арганізмаў у розных экасістэмах. Дзеці былі падзелены на дзве ўзроставыя катэгорыі. У малодшай перамогу святкавала Юлія Грышанава, навучэнка Лошніцкай сярэдняй школы. У старэйшай катэгорыі лепшымі сталі малюнкі Дар’і Гласоўскай, навучэнкі сярэдняй школы № 11 Барысава, Вольгі Пятровіч, якая вучыцца ў барысаўскай сярэдняй школе № 16, і Дзіяны Беркінай, навучэнкі Аздзяціцкага дзіцячага сада — сярэдняй школы.
У конкурсе постараў адлюстроўвалася праблема захавання біяразнастайнасці і прапаноўваліся шляхі яе вырашэння ў Беларусі. Найлепш гэтую тэму раскрылі Мірон Угрумаў, выхаванец ясляў-сада № 12, Антон Кушнярэвіч і Сяргей Жораў, якія вучацца ў Мсціжскай сярэдняй школе і працавалі разам.
Педагогам прапаноўваўся конкурс на лепшую метадычную распрацоўку экаквеста па вывучэнні і захаванні біяразнастайнасці Рэспублікі Беларусь. Першае месца падзялілі педагогі Барысаўскага цэнтра экалогіі і турызму Таццяна Уладзіміраўна Багушэвіч і Алена Анатольеўна Райнеш, якія распрацавалі квест-гульню “Зялёныя школы”, і Вольга Сяргееўна Гота, намеснік дырэктара сярэдняй школы № 9, якая прадставіла экаквест “Экарыён”.
Пераможцы і прызёры конкурсу атрымалі ад арганізатараў узнагароды і падарункі, а іх работы дэманструюцца ў аддзеле галерэйна-выставачнай дзейнасці Барысаўскай цэнтральнай раённай бібліятэкі імя І.Х.Каладзеева. Наведаць выставу могуць усе жадаючыя.
Дар’я РЭВА.
Фота Алены РАЙНЕШ.
