Капітанскі мосцік

Рэдкі выпадак, калі адна навучальная ўстанова прадстаўляе на міжнародны чэмпіянат адразу двух канкурсантаў для выступлення ў дзвюх розных кампетэнцыях. (Другі раз такое ўдаецца Мінскаму  прафесійнаму ліцэю № 5 транспартнага будаўніцтва.) На сёлетнім спаборніцтве ў Казані філіял БНТУ “Барысаўскі дзяржаўны політэхнічны каледж”паўтарыў гэты вынік. Аляксандр Філіпаў і Дзмітрый Грук, ужо выпускнікі каледжа, і ў ім засталіся працаваць. На чэмпіянаце Аляксандр Філіпаў выступае ў кампетэнцыі “Аўтамабільныя тэхналогіі”, а Дзмітрый Грук — у “Такарных работах на станках з праграмным кіраваннем”. Дзмітрый — капітан нашай зборнай. Адказнасць, як кажуць, зашкальвае.Трэба не падвесці каманду.

Дырэктары каледжаў наведалі пляцоўкі чэмпіянату.

Шлях да міжнароднага чэмпіянату быў няпросты для хлопцаў. Прайшоўшы складаныя адборачныя выпрабаванні, яны выступілі на Нацыянальным чэмпіянаце WorldSkills Belarus — 2018 і сталі лідарамі. Аляксандр заняў 3-е месца, Дзмітрый заваяваў “золата”. Напружаным выдаўся падрыхтоўчы перыяд: хлопцы рыхтаваліся да выступлення ў Казані на самых розных пляцоўках, у розных гарадах і нават краінах. Базу прадаставілі і нашы прадпрыемствы Барысава і Мінска, якія аснашчаны самым сучасным абсталяваннем, у тым ліку Барысаўскі завод агрэгатаў, Мінскі механічны завод імя С.І.Вавілава. У прафесійнай падрыхтоўцы канкурсантаў значную дапамогу, у тым ліку метадычную, аказаў Рэспубліканскі інстытут прафесійнай адукацыі.

У падрыхтоўцы канкурсантаў прымаюць удзел нацыянальныя эксперты WorldSkills па аўтамабільных тэхналогіях А.В.Царук, выкладчык філіяла РІПА “Мінскі дзяржаўны аўтамеханічны каледж імя акадэміка М.С.Высоцкага”, і па такарных работах з праграмным кіраваннем А.Я.Рыбак, дырэктар філіяла РІПА “Каледж сучасных тэхналогій у машынабудаванні і аўтасэрвісе”. Эфектыўнай пляцоўкай для падрыхтоўкі з’яўляецца і сам барысаўскі каледж, вучэбна-матэрыяльная база якога пастаянна абнаўляецца, ствараюцца новыя вучэбныя лабараторыі, прыгодныя для вывучэння электраабсталявання аўтамабіляў, прывадаў, аўтаматызацыі працэсаў у машынабудаванні, для вывучэння такарнай справы. У каледжы імкнуцца весці прафесійную падрыхтоўку на самым высокім узроўні і для гэтага не шкадуюць фінансавых сродкаў. Эфектыўнай матывацыяй у навучанні з’яўляецца WorldSkills. Дзякуючы дырэктару, выдатнаму арганізатару, творчаму, ініцыятыўнаму кіраўніку У.Ю.Шмакаву, каледж уступіў у рух WorldSkills у самым пачатку яго развіцця ў Беларусі і паступова набірае тэмп.

У 2014 годзе ў І Рэспубліканскім конкурсе прафесійнага майстэрства WorldSkills навучэнцы каледжа ўдала выступілі ў 2 кампетэнцыях па фрэзернай і такарнай справе. У ІІ Нацыянальным чэмпіянаце 2016 года выхаванцы ўстановы выступілі ўжо ў 4 кампетэнцыях: такарныя, фрэзерныя, кузаўныя работы і аўтамабільныя тэхналогіі. У 2018 годзе — у 8 кампетэнцыях, а ў 2020 годзе плануюць выступіць у 10. У кампетэнцыі “Электроніка” дырэктар каледжа быў экспертам. У прафесійнай кампетэнцыі “Геадэзія”, якая ўключана толькі ў дамашні чэмпіянат, каледж стаў пераможцам.

У цэлым калектыў навучальнай установы вельмі згуртаваны і аб’яднаны адной ідэяй — рыхтаваць кадры згодна з тымі патрабаваннямі, якія прад’яўляе наша эканоміка. Сярод педагогаў — У.М.Адаменка, выкладчык, даследчык і эксперт па кампетэнцыі “Такарныя работы з праграмным кіраваннем”, які займаўся падрыхтоўкай Дзмітрыя Грука. У засваенні аўтамабільных тэхналогій дапамагае Аляксандру Філіпаву выкладчык каледжа М.І.Дзюбайла. Абодва хлопцы-канкурсанты вучыліся ў аддзяленні машынабудавання, загадчыцай якога з’яўляецца Л.В.Залеўская. Яна прымае самы актыўны ўдзел у падрыхтоўцы канкурсантаў WorldSkills. Па сутнасці, увесь калектыў задзейнічаны ў гэтым руху, і кожны выдатны вынік іх выхаванцаў на конкурсах — гэта вынік і работы педагогаў каледжа. Акрамя таго, хлопцы вывучалі англійскую мову, займаліся фізічнай падрыхтоўкай, ім аказвалі псіхалагічную падтрымку. Цяпер застаецца толькі перамагаць.

Згодна з заданнем для кампетэнцыі “Аўтамабільныя тэхналогіі”, канкурсанту неабходна правесці дыягностыку электраабсталявання аўтамабіля,  электроннай сістэмы кіравання рухавіком, правесці яго разборку, вызначыць і ліквідаваць няспраўнасці, ажыццявіць зборку ў правільнай паслядоўнасці. Пры выкананні задання канкурсант выкарыстоўвае набор слясарнага інструменту, спецпрылады, вымяральны інструмент і інш.

У такарных работах з праграмным кіраваннем Дзмітрый Грук спачатку стварае чарцяжы, па якіх неабходна вырабіць дэталь на такарным станку згодна з конкурсным заданнем, з дапамогай праграмнага забеспячэння запісвае кіруючую праграму і пасля праверкі праграмы тэхнічным экспертам прыступае да вырабу дэталі. Трэба сказаць, што заданне вельмі складанае і адпавядае даволі высокаму кваліфікацыйнаму разраду. Але хлопец хвалюецца яшчэ і па іншай прычыне: ён жа капітан зборнай Беларусі, таму выступіць трэба адпаведна. Так і атрымалася. Хлопец справіўся з заданнямі дастойна.

Ала КЛЮЙКО, Казань.
Фота аўтара.