У мікрараёне Хутар школу чакаюць усе. За ходам яе будаўніцтва назіраюць і жыхары, і высокія госці. Не так даўно важны сацыяльны аб’ект наведала Старшыня Савета Рэспублікі Нацыянальнага сходу Рэспублікі Беларусь Наталля Качанава.
Будаўніцтва ў 96-м мікрараёне Гомеля падыходзіць да завяршэння. Работы на пляцоўцы не спыняюцца нават ноччу і ў выхадныя. Задача — каб 1 верасня для соцень хлопчыкаў і дзяўчынак тут празвінеў званок. Наталля Качанава высока ацаніла рэалізацыю сацыяльнага праекта, тэмпы яго будаўніцтва і ўнікальнасць. Дарэчы, другой такой школы ў Беларусі няма. На тэрыторыі аб’екта — два басейны, над якімі знаходзяцца спартыўныя залы, музычныя і для заняткаў харэаграфіяй, ёсць вялікі стадыён з пляцоўкамі для варкаўта, баскетбола, валейбола, а таксама дзіцячыя пляцоўкі.
Начальнік галоўнага ўпраўлення адукацыі Руслан Смірноў штодзень на гэтым важным сацыяльным аб’екце. Да таго ж каля ста супрацоўнікаў устаноў адукацыі Навабеліцкага раёна працуюць на самых розных дапаможных работах. На заключным этапе да іх далучаюцца педагогі з іншых раёнаў Гомеля і тэхнічны персанал школ. Займаюцца галоўным чынам мыццём вокнаў, ачышчэннем падлог і ўборкай смецця. Мужчыны задзейнічаны на пераносцы і зборцы мэблі.
Увогуле на аб’екце задзейнічана каля сямісот чалавек. Свой уклад робіць моладзь. З пачатку лета тут працавалі больш 30 байцоў трох будаўнічых атрадаў. У тым ліку сэрвісны студэнцкі атрад “Імпульс” прыступіў да ўпрыгожвання інтэр’ера. 11 студэнтаў — будучыя архітэктары і дызайнеры — працуюць на абласной маладзёжнай будоўлі.
Маладыя людзі атрымліваюць вопыт непасрэдна па профілі сваёй будучай прафесіі, вучацца чытаць чарцяжы. Пры гэтым маюць магчымасць падзарабіць. Маладыя людзі дадаюць іскрынку ў інтэр’ер блока для пачатковай школы — размалёўваюць сцены. З іх лёгкага пэндзля ствараецца ўтульная атмасфера ў школьных калідорах — рознакаляровая геаметрыя, гіганцкія алоўкі.
Асноўная частка атрада — навучэнцы Гомельскага дзяржаўнага мастацкага каледжа і Гомельскага дзяржаўнага прафесійна-тэхнічнага каледжа народных мастацкіх промыслаў. Камандзір атрада — другакурсніца Беларускага дзяржаўнага ўніверсітэта транспарту Ангеліна Калацэй гаворыць, што вялікай кампаніяй працаваць добра:
— Мы паглыбіліся ў працоўны працэс — усё па нашай спецыяльнасці. Распісваем сцены па эскізах, вывучаем праекты. Увасабляем у жыццё задумы дызайнераў. Праца творчая, усім цікава.
Трэцякурсніца Гомельскага дзяржаўнага мастацкага каледжа Настасся Парфёнава з задавальненнем займаецца з палітрай яркіх фарбаў. Дзяўчына ўжо другі год працуе ў студэнцкім атрадзе. Па меркаванні будучага дызайнера, усё атрымліваецца свежа і ярка:
— Мы ж для маленькіх дзяцей робім — ім павінна спадабацца.
Працоўны дзень пачынаецца ў восем раніцы і доўжыцца да сямнаццаці гадзін з перапынкам на абед. За якасцю работ сочаць спецыялісты — прадстаўнікі філіяла СУ-47 ААТ “Будаўнічы трэст №14”. Цяпер студэнцкі атрад адначасова працуе на двух паверхах. На чарзе — трэці. Таксама прадугледжана размалёўка сцен у сталовай і часткова ў блоку для старшых класаў.
На аб’екце завершаны мантаж жалезабетонных канструкцый, завяршаюцца апрацоўчыя работы, добраўпарадкоўваюцца тэрыторыя школьнага двара, зоны для заняткаў спортам і адпачынку. Ужо прыступілі да мантажу абсталявання і ўстаноўкі мэблі. Ніякіх збояў з пастаўкамі матэрыялаў няма.
— Больш чым на тры чвэрці сфарміраваны штат педагогаў для работы ў новай школе, — адзначае начальнік упраўлення адукацыі Гомельскага гарвыканкама Святлана Кухарава. — Што да колькасці дзяцей, то вельмі шмат заяў ад бацькоў. І не толькі з гэтага, 96-га мікрараёна. Праектная магутнасць установы адукацыі разлічана на 845 вучняў, а на сёння ў нас амаль 1300 заяў. Таму школа будзе працаваць у дзве змены.
Плануецца, што ўжо 1 верасня школа прыме першых вучняў.
Ірына АСТАШКЕВІЧ.
Фота аўтара.