Менавіта так назвалі сустрэчу з маладымі спецыялістамі ўстаноў адукацыі, падпарадкаваных галоўнаму ўпраўленню адукацыі Гродзенскага аблвыканкама, што праходзіла ў абласным цэнтры і была арганізавана ў выглядзе дыялогавай пляцоўкі.
На сустрэчу запрасілі юнакоў і дзяўчат, якія ў гэтым годзе сталі выпускнікамі навучальных устаноў і не толькі атрымалі сваё першае працоўнае месца, але і паспяхова стартавалі ў прафесійным плане. Сёлета педагагічная сям’я Гродзеншчыны папоўнілася больш як на 700 маладых спецыялістаў, з іх 76 чалавек пачалі працоўны шлях у навучальных установах, падпарадкаваных галоўнаму ўпраўленню адукацыі аблвыканкама: у ліцэях, каледжах, цэнтрах творчасці, турызму і краязнаўства, эколага-біялагічным цэнтры, санаторных школах. Большасць з іх прынялі ўдзел у мерапрыемстве.
Сустрэўшыся ў Гродне, а многія маладыя людзі працуюць у розных кутках вобласці, яны адразу накіраваліся на экскурсію па гістарычным цэнтры горада. Значным момантам мерапрыемства стала дыялогавая пляцоўка паміж моладдзю і кіраўніцтвам галоўнага ўпраўлення адукацыі аблвыканкама. Вопытам сваёй працы, а таксама сакрэтамі майстэрства падзяліліся з моладдзю паспяховыя кіраўнікі, якія не так даўно і самы былі маладымі спецыялістамі, а цяпер узначальваюць установы, а таксама ветэраны працы сістэмы адукацыі.
Звяртаючыся да маладых педагогаў, начальнік галоўнага ўпраўлення адукацыі аблвыканкама Руслан Абрамчык адзначыў:
— Шэраг мерапрыемстваў, прымеркаваных да пачатку навучальнага года, праходзіць пад нефармальным слоганам “Мы адзінае цэлае”. Сёння сваю работу пачынае клуб “Малады спецыяліст” для тых, хто прыйшоў працаваць у дзяржаўныя ўстановы сістэмы прафесійнай і дадатковай адукацыі, санаторныя школы, падпарадкаваныя галоўнаму ўпраўленню адукацыі аблвыканкама. Гэта майстры вытворчага навучання, настаўнікі. У радах маладых спецыялістаў ёсць пераможцы Рэспубліканскага конкурсу прафесійнага майстэрства WorldSkills Belarus, тыя, хто скончыў вышэйшыя і сярэднія спецыяльныя навучальныя ўстановы. Многія выпускнікі, атрымаўшы дыпломы, засталіся працаваць у тых навучальных установах, якія скончылі.
Мерапрыемства гэтае не разавае. Клуб “Малады спецыяліст” будзе раз у квартал запрашаць юнакоў і дзяўчат на сустрэчы. Плануюцца яны не толькі ў Гродне, але і ў іншых гарадах вобласці.
— Так склалася, што вашы калегі, якія працуюць у школах і дзіцячых садках, уключаюцца ў работу клубаў маладога спецыяліста ў сваіх раёнах. Таму з’явілася ідэя сабрацца разам з маладымі людзьмі, што працуюць у нашых установах адукацыі, для таго каб усе зразумелі, што мы адно цэлае, працуем у адным напрамку. Спадзяюся, што наступныя сустрэчы не будуць такімі афіцыйнымі, дапамогуць вам пазнаёміцца адно з адным, што паспрыяе і прафесійнаму росту, і поспеху нашай сістэмы. Хацелася б, каб, пачынаючы свой прафесійны шлях, вы разумелі, што не адны, побач знаходзяцца калегі, у якіх могуць узнікнуць тыя ж пытанні і праблемы, а разам іх лягчэй вырашыць. Мы нездарма запрасілі прадстаўнікоў розных грамадскіх аб’яднанняў, каб на старце вашай прафесійнай кар’еры яшчэ раз нагадаць, на якую сацыяльную падтрымку вы можаце разлічваць, — падкрэсліў Руслан Абрамчык.
Вельмі прыемна, што сярод маладых педагогаў тыя, хто ўжо дасягнуў пэўных вышынь у прафесійнай альбо грамадскай дзейнасці. Сярод удзельнікаў сустрэчы быў пераможца Рэспубліканскага конкурсу прафесійнага майстэрства WorldSkills Belarus Яўген Чэрнік. Малады чалавек прызнаўся, што заўсёды марыў звязаць сваё жыццё са сталярным рамяством. Атрымаўшы прафесію, застаўся працаваць майстрам у Мірскім дзяржаўным мастацкім прафесійна-тэхнічным каледжы, дзе і вучыўся.
Дарэчы, яшчэ ў 2016 годзе галоўнае ўпраўленне адукацыі выступіла ініцыятарам стварэння “Віртуальнай Кнігі гонару маладых спецыялістаў”, у якую сёння ўпісана 25 імён. Як расказаў Руслан Абрамчык, напярэдадні Дня настаўніка кніга папоўніцца шэрагам імён. Плануецца таксама заснаваць прэмію для настаўнікаў моладзі, вопытных педагогаў, якія дапамаюць ім у прафесійным росце.
Пра метадычную работу, што праводзіцца з маладымі спецыялістамі, каб дапамагчы ім рэалізаваць сябе ў выбранай прафесіі, расказала рэктар Гродзенскага абласнога інстытута развіцця адукацыі кандыдат педагагічных навук Святлана Сяргейка.
— Асноўныя прафесійныя кампетэнцыі вы будзеце адпрацоўваць у першыя два гады. Гаворачы вобразна, УВА навучылі вас чытаць, а як аналізаваць твор, напісаць сачыненне — гэтаму вы будзеце вучыцца падчас сваёй прафесійнай дзейнасці. І тут дапаможа сістэма дадатковай адукацыі дарослых. У абласным інстытуце развіцця адукацыі круглы год працуе віртуальная школа маладога педагога. Гэта электронны рэсурс, з дапамогай якога малады педагог можа пазнаёміцца з неабходнымі яму для працы метадычнымі дакументамі і каментарыямі да іх, атрымаць карысныя парады. Таксама працуе летняя школа маладога педагога, праводзіцца фестываль педагагічных ідэй. У канікулярны час рэалізуюцца мэтавыя праграмы павышэння кваліфікацыі. Традыцыйным стаў фестываль педагагічных ідэй. Моладзь мае магчымасць прыняць удзел у прафесійных конкурсах, далучыцца да праектнай і інавацыйнай дзейнасці. А з гэтага навучальнага года адчыніць свае дзверы клуб маладых і паспяховых, пачне працаваць педагагічная студыя. Удзел у гэтых мерапрыемствах дапаможа набыць прафесійныя навыкі і развіць свае здольнасці, — адзначыла Святлана Сяргейка.
Якія сацыяльныя гарантыі сёння прадастаўляе краіна маладым спецыялістам, расказала галоўны прававы інспектар працы Гродзенскага абласнога аб’яднання прафсаюзаў Іна Мельнікава. І гэта не толькі тыя, што гарантаваны дзеючым заканадаўствам, іх спіс пашыраны дзякуючы прынятаму пагадненню паміж Гродзенскім аблвыканкамам, абласным саюзам наймальнікаў і абласным аб’яднаннем прафсаюзаў. Пэўныя пункты ўносяцца ў калектыўныя дагаворы прадпрыемстваў і арганізацый.
Загадчыца аддзела праектнай дзейнасці Гродзенскага абласнога камітэта БРСМ Наталля Станюкевіч запрасіла маладых людзей да ўдзелу ў шматлікіх конкурсах і праектах. А дырэктар Гродзенскага абласнога цэнтра тэхнічнай творчасці Аляксандр Грэцкі расказаў сваю гісторыю поспеху, падзяліўся вопытам, набытым падчас работы.
Карыснамі былі і парады старшыні камісіі па рабоце з моладдзю Гродзенскага абласнога савета ветэранаў Аляксандра Сягодніка, які ў свой час узначальваў абласное ўпраўленне адукацыі.
— Ганарыцеся тым, што працуеце ў сістэме адукацыі Гродзенскай вобласці — адной з лепшых у краіне. Прыкладвайце ўсе намаганні, каб вамі ганарыліся ваша сям’я, калегі, рэгіён і ўся краіна, — адзначыў Аляксандр Іванавіч.
Ганаровыя граматы і падзякі за сваю працу моладзі яшчэ атрымліваць ранавата, таму прыемным сюрпрызам для іх стала ўручэнне пасланняў з цёплымі словамі падтрымкі ад галоўнага ўпраўлення адукацыі аблвыканкама.
Прыемным завяршэннем сустрэчы стала забаўляльная праграма “Курс маладога спецыяліста”. Падчас інтэлектуальных конкурсаў моладзь мела магчымасць бліжэй пазнаёміцца, набыць сяброў і аднадумцаў.
Ірына АНІКЕВІЧ.
Фота Міхаіла ІСАЧАНКІ.
