Днямі на базе Мінскага аўтамабільнага завода адбылася перадача турыстычнага аўтобуса МАЗ акадэмічнаму асяроддзю БДПУ імя Максіма Танка.
Аўтобус МАЗ-251 экалагічнага класа “Еўра-5” — прадстаўнік другога пакалення турыстычных аўтобусаў, якія вырабляюцца на аўтазаводзе па ўласнай распрацоўцы (камплектуюцца рухавіком Mersedes-Benz, магутнасць якога складае 360 конскіх сіл). Яго адрознівае сучасны знешні выгляд і тэхнічны комплекс — сістэма кандыцыянавання, халадзільнік, міні-кухня з мікрахвалевай печчу і інш. Аўтобус, які па навізне канструкцыі і базавай аснашчанасці не мае сабе роўных у СНД, быў сабраны для ўніверсітэта па ініцыятыве Міністэрства адукацыі.
Па словах рэктара БДПУ імя Максіма Танка Аляксандра Жука, падобны вопыт узаемадзеяння паміж універсітэтам і прадпрыемствам пачаўся ў 2008 годзе. Тады для ВНУ быў сабраны аўтобус МАЗ-152А. Аляксандр Іванавіч адзначыў, што якасць падоранага аўтобуса, які пяшчотна называюць прыгажуном-лайнерам, падкрэслівае высокі ўзровень развіцця Мінскага аўтамабільнага завода.
МАЗ-251 у будучыні чакае насычанае жыццё. На ім студэнты БДПУ будуць выязджаць на валанцёрскія і педагагічныя практыкі ў аздараўленчыя летнікі, прымаць удзел у традыцыйных “Зорных паходах”, спаборніцтвах. Важнае значэнне, па словах Аляксандра Жука, будзе мець турыстычная скіраванасць будучых маршрутаў па Беларусі і за мяжой. Чакаецца, што экскурсаводамі ў такіх паездках будуць выступаць студэнты-гісторыкі, якія вучацца на спецыяльнасці “Гісторыя і экскурсійна-краязнаўчая работа”.
Падрыхтавала Ірына ІВАШКА.
Фота Алега ІГНАТОВІЧА.