Шкала прыярытэтаў

Пракуратура Віцебскай вобласці правяла каардынацыйную нараду па барацьбе са злачыннасцю і карупцыяй, на якой разгледжаны пытанні ўзаемадзеяння дзяржаўных органаў па папярэджанні злачыннасці непаўналетніх, выяўленні дзяцей, якія апынуліся ў экстрэмальнай жыццёвай сітуацыі, сталі ахвярамі злачынстваў, жорсткасці і насілля.

На нарадзе адзначана, што органы выканаўчай улады і праваахоўнікі прымаюць практычныя меры, накіраваныя на папярэджанне падлеткавай злачыннасці і аздараўленне сітуацыі ў нядобранадзейных сем’ях. Разам з тым у арганізацыі гэтай работы ёсць значныя недахопы.

У мінулым годзе на тэрыторыі Віцебскай вобласці зарэгістраваны 223 злачынствы, учыненыя непаўналетнімі, што на 4,2% больш, чым за аналагічны перыяд мінулага года. Узрасла колькасць асабліва цяжкіх злачынстваў, а таксама злачынстваў, учыненых падлеткамі ў стане наркатычнага ап’янення. Акрамя таго, павялічылася колькасць (з 45 да 66) грамадска небяспечных дзеянняў, у якіх прымалі ўдзел дзеці, што не дасягнулі ўзросту крымінальнай адказнасці.

У той жа час не ўсюды на месцах забяспечваецца комплекснае выкарыстанне прававых метадаў карэкцыі проціпраўных паводзін моладзі. У асобных падраздзяленнях органаў унутраных спраў дапускаюцца факты фармалізму работы з падлеткамі, павярхоўнага вывучэння асобы і асяроддзя, неналежнага ўзаемадзеяння з іншымі суб’ектамі прафілактыкі правапарушэнняў. У шэрагу рэгіёнаў неналежна ажыццяўляецца работа камісій па справах непаўналетніх па прафілактыцы падлеткавай злачыннасці. Актуальныя пытанні папярэджання ўстановамі адукацыі правапарушэнняў сярод падлеткаў, асабліва навучэнцаў устаноў прафесійна-тэхнічнай і сярэдняй спецыяльнай адукацыі, якімі здзейснена 60% злачынстваў. Выяўлены недахопы ў арганізацыі вольнага часу моладзі, памылкі ў правядзенні індывідуальнай прафілактычнай работы з навучэнцамі, адсутнасць пастаяннага ўзаемадзеяння з работнікамі ІСН, у прыватнасці, у дачыненні да навучэнцаў з іншай мясцовасці.

Па выніках каардынацыйнай нарады прынята рашэнне, накіраванае на паляпшэнне якасці прафілактычных мерапрыемстваў, павышэнне персанальнай адказнасці службовых асоб за стан гэтай работы.

Алена ХАРЛАМАВА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *