Стыпендыі — лепшым студэнтам

Сучасная эканамічная і сацыякультурная сітуацыя ў краіне патрабуе ад сістэмы вышэйшай адукацыі падрыхтоўкі канкурэнтаздольных спецыялістаў, якія змогуць браць ініцыятыву ў свае рукі. Менавіта такімі спецыялістамі-пачаткоўцамі можна назваць пяцярых студэнтаў фізіка-матэматычнага факультэта БДПУ імя Максіма Танка, якія атрымалі стыпендыі Пріорбанка.

Стыпендыі Пріорбанка ўжо на працягу некалькіх гадоў прызначаюцца лепшым студэнтам старшых курсаў дзённай формы навучання і выплачваюцца ім на працягу вучэбнага семестра. Галоўнымі крытэрыямі адбору маладых людзей, па словах намесніка старшыні праўлення Пріорбанка Сяргея Шышова, з’яўляюцца высокая паспяховасць і актыўны ўдзел у навукова-даследчай працы.

— Мы разумеем, што асоба настаўніка ў наш час з’яўляецца ключавой фігурай, бо ён працуе з будучыняй краіны — дзецьмі, выхоўвае іх, — звярнуўся да маладых людзей рэктар БДПУ Аляксандр Жук. — Спадзяёмся, што стыпендыя падтрымае вас, натхніць на прафесійны рост і самаўдасканаленне і што ўсе вы станеце кваліфікаванымі педагогамі. Беларусь — гэта ІТ-краіна. Каб будаваць яе далей, трэба шмат працаваць. Вялікае месца тут адводзіцца настаўнікам матэматыкі, фізікі і інфарматыкі, бо менавіта ў школе закладваецца цікавасць вучняў да дакладных навук.

Сярод узнагароджаных — студэнткі 3 курса фізіка-матэматычнага факультэта БДПУ Аксана Куркузава, Ганна Сокал, Вольга Лявонава і чацвёртакурсніца Любоў Меснік. А Кірыл Сафранчук атрымаў стыпендыю ўжо другі раз.

— Нам проста падабаецца тое, што мы робім, таму і атрымліваюцца такія высокія вынікі ў вучобе, — падзяліліся ўзнагароджаныя. Любоў Меснік пераканана, што галоўная ўмова поспеху — уласная матываванасць, а для Кірыла Сафранчука гэта граматна спланаваны час і правільна расстаўленыя прыярытэты на карысць дакладных навук.

Студэнты, імклівы поспех якіх адзначаны стыпендыяй Пріорбанка, упэўнены, што для мэтанакіраваных людзей няма таго, чаго нельга дасягнуць.

Ірына ІВАШКА.
Фота аўтара.

Пакінуць каментарый

Ваш электронны адрас не будзе апублікаваны. Абавязковыя палі пазначаны *