Павіншаваць лепшых педагогаў вобласці з прафесійным святам на Гродзеншчыне вырашылі ў незвычайным фармаце, без прывычных пасяджэнняў з дакладамі. Для іх разгарнулі чырвоную дарожку ў Лідскім замку, а затым запрасілі на шосты школьны дзень “ПрафСтарт” у аздараўленчы лагер “Бярозка”.
Ад змены фармату мерапрыемства не страціла ўрачыстасці. Муры Лідскага замка толькі надалі яму яркіх фарбаў. Прыемнай стала і экскурсія па замку для ўсіх гасцей свята. А калі пачалася ўрачыстая цырымонія ўзнагароджання лепшых педагогаў вобласці, то кожны з іх павінен быў прайсці да сцэны па чырвонай дарожцы, што ўжо выклікала прыўзняты настрой і нават нейкае хваляванне.
У святочным мерапрыемстве прынялі ўдзел дэпутат Палаты прадстаўнікоў Нацыянальнага сходу Рэспублікі Беларусь Аляксандр Сонгін, старшыня камісіі па рабоце з моладдзю Гродзенскага абласнога савета ветэранаў Аляксандр Сягоднік, старшыня абласнога савета ветэранаў педагагічнай працы і прафсаюзнай работы Уладзімір Гаўрон.
Цёплыя словы ў адрас усіх педагогаў вобласці і, у праватнасці тых, хто прыняў удзел у свяце, сказаў начальнік галоўнага ўпраўлення адукацыі Гродзенскага аблвыканкама Руслан Абрамчык:
— Прафесійнае свята сёлета мы дружным калектывам адзначаем у культурнай сталіцы Беларусі. Менавіта тут, у сценах Лідскага замка мы ўручаем узнагароды лепшым з лепшых. Паважаныя калегі, з Днём настаўніка вас! Здароўя вам, энергіі, прафесійнага росту, дабрабыту. Хочацца пажадаць, каб у бягучым навучальным годзе нас чакала больш перамог, дасягненняў у кожнай школе, кожным ліцэі і каледжы. Хацелася б унесці прапанову, каб бягучы навучальны год стаў годам эстэтычнага выхавання ў нашых навучальных установах.
Як адзначыў Руслан Абрамчык, сёлета многае было ўпершыню: шмат перамог і знаходак:
— Упершыню ў сістэме адукацыі Гродзеншчыны з’явілася прэмія ў галіне якасці — дыплом, які атрымаў Гродзенскі абласны інстытут развіцця адукацыі. Упершыню ўручаецца прэмія “За настаўніцтва”. Выдатна справіліся з заданнямі нашы школьнікі на прадметных алімпіядах, якія праходзілі ў складанай эпідэмічнай сітуацыі. Хацелася б адзначыць выдатны вынік нашых педагогаў на конкурсе “Настаўнік года”. Усебаковая падтрымка аказваецца маладым спецыялістам, маладым кіраўнікам сістэмы адукацыі Гродзеншчыны.
Ва ўрачыстай атмасферы лепшыя педагогі вобласці былі ўзнагароджаны ганаровымі граматамі Гродзенскага абласнога выканаўчага камітэта, атрымалі падзякі старшыні аблвыканкама, граматы і ганаровыя граматы Міністэрства адукацыі Рэспублікі Беларусь, узнагароды цэнтральнага камітэта Беларускага прафесійнага саюза работнікаў адукацыі і навукі, рэспубліканскага грамадскага аб’яднання “Белая Русь”. Уручаны прэміі “Лідар настаўніцтва” і “Паспяховы старт”.
Нагрудны знак Міністэрства адукацыі Рэспублікі Беларусь “Выдатнік адукацыі” атрымала начальнік упраўлення адукацыі Гродзенскага райвыканкама Таццяна Аксаміт. Пад яе кіраўніцтвам на працягу 10 гадоў раён з’яўляецца лепшым у вобласці па забеспячэнні якасных паказчыкаў сістэмы дашкольнай адукацыі, арганізацыі выхаваўчай работы і якаснага аздараўлення. Таксама знак “Выдатнік адукацыі” ўручаны загадчыку сектара выхаваўчай і сацыяльнай работы ўпраўлення адукацыі Ваўкавыскага райвыканкама Святлане Стачук, дырэктару сярэдняй школы № 5 Смаргоні Раісе Захарыч і настаўніцы рускай мовы і літаратуры гімназіі № 9 імя Ф.П.Кірычэнка Гродна Аліне Касцюк.
Аліна Касцюк прызналася:
— Я вельмі рада атрымаць гэтую ўзнагароду, але яна належыць не толькі мне, а і таленавітым адораным вучням, якія навучыліся мяне слухаць, чуць і разумець. З упэўненасцю магу сказаць, што я шчаслівая настаўніца, таму што магу назіраць, як растуць у сваіх ведах, уменнях, сваёй упэўненасці мае вучні. У прафесіі я амаль сорак гадоў. Пастаянна самаўдасканальваюся, шукаю нешта новае. Ганаруся сваімі вучнямі. У 2019/2020 навучальным годзе мая выхаванка заваявала дыплом ІІ ступені на заключным этапе алімпіяды школьнікаў Саюзнай дзяржавы.
Яшчэ ў 2016 годзе галоўнае ўпраўленне адукацыі Гродзенскага аблвыканкама выступіла ініцыятарам стварэння “Віртуальнай кнігі гонару маладых спецыялістаў сістэмы адукацыі Гродзенскай вобласці”. Падчас свята абвешчаны імёны тых, хто напярэдадні Дня настаўніка ўпісаны ў кнігу гонару. Пасведчанне маладым спецыялістам уручылі Руслан Абрамчык і старшыня Гродзенскай абласной арганізацыі Беларускага прафсаюза адукацыі і навукі Вера Грышэчка.
Віншавальныя словы з Днём настаўніка таксама адрасавалі ўдзельнікам свята намеснік страшыні Лідскага райвыканкама Генадзь Владыка і намеснік старшыні Гродзенскай абласной арганізацыі рэспубліканскага грамадскага аб’яднання “Белая Русь” Святлана Вараніца.
Яркімі і эмацынальнымі былі віншаванні ад дзіцячых творчых калектываў Гродзеншчыны.
Незвычайна і цікава прадоўжылася свята ў аздараўленчым лагеры “Бярозка”. Супрацоўнікі Гродзенскага абласнога Палаца творчасці дзяцей і моладзі крэатыўна падышлі да падрыхтоўкі. Быў абвешчаны шосты школьны дзень у выглядзе школы “ПрафСтарт” — паляпшэння вольнага часу настаўнікаў. Падзяліўшыся на каманды, педагогі на імправізаваных уроках выконвалі пэўныя заданні. Адны заняліся пасадкай алеі з туй, другія ў гэты час на валанцёрскай пляцоўцы збіралі шышкі і майстравалі домік для насякомых. Маладыя спецыялісты ў рамках Школы актыўнага грамадзяніна рыхтавалі флэш-моб, а супрацоўнікі прафесійна-тэхнічных устаноў творча, у вершаванай форме прэзентавалі 80-годдзе сваёй сістэмы. На спартыўнай пляцоўцы можна было прявіць сябе ў гульні ў шашкі альбо гольф, яздзе на веласіпедзе, пакідаць дроцікі ў дартс.
Такі своеасаблівы педагагічны капуснік прыйшоўся ўсім даспадобы. Нягледзячы на невялікі дождж, сумаваць нікому не давялося. А такое свята запомніцца надоўга.
Ірына АНІКЕВІЧ.
Фота аўтара.