Значнасць выкладання эканомікі ў школе нельга пераацаніць. Навучэнцаў нашай школы штогод знаёмяць з асновамі фінансавай дасведчанасці таленавітыя артысты пад кіраўніцтвам выхавальніка групы прадоўжанага дня вышэйшай педагагічнай катэгорыі Таццяны Уладзіміраўны Казанковой.
Таццяна Уладзіміраўна ўпэўнена: пачатковыя ўяўленні аб найважнейшых сувязях свету і чалавека фарміруюць з ранняга дзяцінства менавіта казкі. Дзіця часам не жадае асэнсоўваць некаторыя рэчы, лічачы іх надзвычай складанымі, а таму сумнымі. Але калі прапанаваць яму знаёміцца з такімі эканамічнымі паняццямі, як прыбытак, банк, дывідэнды, партнёры, праз казку, фантазію, гульню, то вынік будзе зусім іншы. Бо цікавасць як нельга лепш дапамагае запамінанню і павышае працаздольнасць навучэнцаў.
Напярэдадні навагодніх святаў юным гледачам была прадстаўлена сучасная пастаноўка-сімбіёз дзвюх рускіх народных казак “Калабок” і “Церамок” на новы лад. На сцэне знаёмыя ўсім і ў той жа час абноўленыя казачныя героі: дапытлівы Калабок, Мышка-фермер, Жаба-прадпрымальнік, Вожык-кравец, Заяц-банкір, Ліса — уладальніца салона прыгажосці. Дзеці з цікавасцю сочаць за развіццём падзей на сцэне, дзе юныя таленты ў гульнявой форме распавядаюць аб патрэбах, працы, таварах, грошах. Шквал авацый ад удзячных гледачоў — найвышэйшая ўзнагарода маленькім артыстам. А іх педагог Таццяна Уладзіміраўна ведае, што набытыя веды і ўменні стануць неабходнай асновай для далейшага развіцця эканамічнага адукацыі.
Марына РАМАНАВА,
выхавальніца групы прадоўжанага дня сярэдняй школы № 20 Магілёва.
