Заняткі ў адукацыйных установах Таджыкістана пачнуцца з 17 жніўня, паведаміў журналістам міністр адукацыі і навукі Махмадзюсуф Імомзада.
“Рашэнне аб аднаўленні заняткаў у адукацыйных установах Таджыкістана з 17 жніўня прынята згодна з рашэннем рэспубліканскага штаба па прафілактыцы распаўсюджвання COVID-19”, — сказаў ён.
Паводле яго слоў, як навучэнцы, так і настаўнікі крыху адсталі ад графіка з-за пандэміі каранавіруса. “Гэтыя два тыдні стануць адаптацыйным перыядам і за гэты час навучэнцы пройдуць тыя ўрокі, якія прапусцілі ў канцы мінулага навучальнага года, паўтораць пройдзенае і далей пачнуць новы навучальны год”, — сказаў кіраўнік Мінадукацыі. Пры гэтым ён паведаміў, што дзіцячыя дашкольныя ўстановы з 17 жніўня працаваць не будуць.
Ён адзначыў, што ў выпадку неабходнасці, калі сітуацыя, звязаная з пандэміяй, у краіне пагоршыцца, школьнікі Таджыкістана будуць вучыцца дыстанцыйна, пры гэтым перавага будзе ў тэлевізійнага навучання.
“Міністэрства адукацыі і навукі аддае перавагу тэлевізійным навучальным праграмам, бо не ва ўсіх вучняў ёсць доступ да новых тэхналогій і сеткі інтэрнэт. Разам з партнёрамі мы распрацавалі вучэбныя праграмы для заняткаў і па тэлебачанні, і па інтэрнэце. У выпадку неабходнасці школьнікі Таджыкістана будуць цалкам забяспечаны дыстанцыйным навучаннем”, — сказаў М.Імомзада.
Ён таксама адзначыў, што міністэрства гатова публікаваць падрыхтаваныя для тэлебачання відэаролікі на Youtube.
Вымушаныя канікулы ў школах і дашкольных установах у Таджыкістане былі абвешчаныя з 27 красавіка бягучага года, хоць да гэтага часу афіцыйна наяўнасць каранавіруса ў краіне прызнана не была. Аб афіцыйным выяўленні ў краіне COVID-19 Міністэрства аховы здароўя Таджыкістана абвясціла 30 красавіка.
Падрыхтаваў Уладзімір МАТУСЕВІЧ.
