Навучыць дзяцей быць шчаслівымі і паспяховымі можа толькі шчаслівы і паспяховы чалавек. Сумны, незадаволены жыццём педагог не зможа матываваць вучняў на атрыманне ведаў. У гэтым пераканана настаўніца пачатковых класаў Капачоўскага дзіцячага сада — сярэдняй школы Мсціслаўскага раёна Алена Мікалаеўна Клеянкова.
Педагогіку ў якасці прафесіі Алена Мікалаеўна выбрала без якіх-небудзь роздумаў і пошукаў. З самых ранніх гадоў дакладна вырашыла: будзе настаўнікам. Галоўную ролю ў гэтым імкненні адыграла невычэрпная любоў да дзяцей.
— Кажуць, што настаўнікам нельга стаць, ім трэба нарадзіцца. Мне здаецца, гэтыя словы пра мяне. Я вельмі люблю дзяцей. Люблю іх непрадказальнасць, дапытлівасць, даверлівасць, шчырасць, таму настаўніцкі шлях выбрала свядома. Сёння ўжо не ўяўляю свайго жыцця без школы, без любімых вучняў, — адзначыла А.М.Клеянкова.
Даўнюю мару Алена Мікалаеўна ажыццяўляла ў МДУ імя А.А.Куляшова. Студэнцкія гады сталі для яе яркім і незабыўным часам. Наогул, вучоба ва ўніверсітэце істотна паўплывала на яе лёс.
— Падчас вучобы я не толькі набыла жаданую прафесію. Ва ўніверсітэце сустрэла будучага мужа. Ён таксама настаўнік, у Капачоўскім навучальна-педагагічным комплексе выкладае фізіку. З ім мы ўжо амаль тры дзесяцігоддзі ідзём побач і ў працы, і па жыцці, — расказала А.М.Клеянкова.
Сёння за плячыма Алены Мікалаеўны 26 гадоў педагагічнай дзейнасці, 70 маленькіх выпускнікоў. За гэты час выпрацавана ўласная методыка навучання, якая грунтуецца не толькі на прывіцці дзецям першасных ведаў, уменняў вучыцца самастойна, але і на ўсебаковым духоўна-маральным выхаванні. Да кожнага малыша ў яе індывідуальны падыход, які прыводзіць іх да максімальнай паспяховасці па ўсіх напрамках.
— Дзеці павінны ісці ў школу з радасцю. Дасягнуць гэтага проста: любы ўрок неабходна зрабіць для вучняў адкрыццём. Заняткі будуць паспяховымі, эфектыўнымі тады, калі яны будуць пабудаваны так, каб вучні ў працэсе навучання не толькі авалодвалі ведамі і ўменнямі. Тое, што адбываецца на ўроку, павінна быць для іх цікавым і значным. Для гэтага на кожных занятках трэба ствараць сітуацыю поспеху і творчую атмасферу, — лічыць А.М.Клеянкова.
У гэтай неардынарнай настаўніцы няма аднолькавых урокаў. Усе яны нестандартныя, займальныя. На занятках яна актыўна выкарыстоўвае мультымедыйныя камп’ютарныя і здароўезберагальныя тэхналогіі, іншыя формы і метады навучання, а яшчэ гарманічна сумяшчае ў выкладанні дабрыню і патрабавальнасць у адносінах да дзяцей.
— Даволі часта будую ўрокі па адукацыйнай мадэлі “Крок за крокам”, калі работа арганізоўваецца ў цэнтрах навучання. Шматгадовы вопыт работы паказаў: яе выкарыстанне на занятках аб’ядноўвае ўсё тое, што падабаецца дзецям і важна для настаўніка. Адным з асноўных прынцыпаў гэтай адукацыйнай мадэлі з’яўляецца ажыццяўленне трайнога супрацоўніцтва “настаўнік — вучні — бацькі”, таму на заняткі запрашаю мам і татаў. Падчас навучання ў цэнтрах яны становяцца мне надзейнымі памочнікамі, а сваім дзецям — настаўнікамі, — расказала А.М.Клеянкова.
Нягледзячы на багаты вопыт работы, Алена Мікалаеўна ніколі не спыняецца ў прафесійным развіцці. Яна пастаянна ўдзельнічае ў конкурсах прафесійнага майстэрства, навучальных семінарах і фестывалях, актыўна займаецца інавацыйнай дзейнасцю.
— Добры настаўнік — гэта асоба, якая знаходзіцца ў пастаянным творчым пошуку і імкнецца быць лідарам усюды. Ён спалучае ў сабе любоў да справы і да дзяцей, умее не толькі вучыць, але і вучыцца, у тым ліку ў сваіх вучняў. Я імкнуся адпавядаць гэтым характарыстыкам, таму нястомна ўдасканальваю прафесійнае майстэрства, — расказала А.М.Клеянкова.
Творчасць і захопленасць працай Алены Мікалаеўны цэняць вучні і іх бацькі, кіраўніцтва навучальнай установы.
— Яна майстар сваёй справы. Знаходзіцца ў пастаянным прафесійным самаўдасканаленні, што павышае якасць адукацыйнага працэсу. А яшчэ яна ўзаемадзейнічае з бацькамі, што таксама станоўча ўплывае на паспяховасць вучняў, — заўважыла намеснік дырэктара па вучэбна-выхаваўчай рабоце Т.М.Жылянкова.
Вучні Алены Мікалаеўны ужо могуць пахваліцца першымі дасягненнямі. Яны штогод удзельнічаюць у даследчых канферэнцыях, творчых і інтэлектуальных конкурсах, дзе становяцца ўладальнікамі прызавых дыпломаў.
А.М.Клеянкова з’яўляецца настаўнікам-метадыстам, пераможцам шматлікіх прафесійных спаборніцтваў, узнагароджана граматай Міністэрства адукацыі. Аднак не гэта для яе асноўнае ў працы.
— Для мяне галоўнае педагагічнае дасягненне — гэта паспяховасць маіх вучняў. Я і надалей буду імкнуцца працаваць так, каб дзецям вучоба прыносіла не толькі веды, але і задавальненне ад працэсу вучэння, — запэўніла настаўніца.
Ганна СІНЬКЕВІЧ.
Фота з архіва А.М.КЛЕЯНКОВАЙ.
