З песняй па жыцці

І праз далечаў даль, і скрозь шолах начны
Я змагу расказаць, што мне скажуць яны…

А расказаць можна шмат, бо хор “Світанак” гімназіі № 7 Маладзечна ў чарговы раз пацвердзіў званне народнага хору. Рэпертуар калектыву самы разнастайны: старадаўнія беларускія песні, руская і замежная класіка, беларускія народныя песні ў апрацоўцы сучасных аўтараў. Можна пачуць і ўсім вядомую “Ой, цветет калина”, і музычныя творы на словы У.Карызны, і сібірскую скарагаворку, і чылійскую народную песню і г.д.


Хор настаўнікаў “Світанак” мае багатую гісторыю. Ён быў заснаваны яшчэ ў сярэдняй школе № 7 у 1969 годзе Мікалаем Георгіевічам Елісеенкавым. А ў 1991 годзе хор атрымаў званне “народны” (узорны аматарскі калектыў Рэспублікі Беларусь). На сённяшні дзень калектыў налічвае 28 чалавек. Гэта настаўнікі і работнікі гімназіі, а кіруе з 1995 года незвычайным хорам Вольга Паўлаўна Бялько.

Харавы калектыў шмат робіць для прапаганды музычнай культуры сярод вучняў, бацькоў, насельніцтва. Ужо традыцыйнымі сталі выступленні хору для жыхароў мікрараёна і гасцей гімназіі, спецыяльныя канцэрты для ветэранаў вайны і працы ў санаторыях Маладзечанскага раёна. Адметна, што хор “Світанак” пастаянна ўдзельнічае ў гарадскіх святах і фестывалях.

Калектыў вядомы не толькі ў горадзе, але праявіў сябе і на фестывалі-конкурсе харавой музыкі “Рэха”, стаўшы лаўрэатам.

У рамках Года гасціннасці “Світанак” арганізаваў творчую сустрэчу з народным ансамблем “Вербніца” (Брэст) і яго кіраўніком кампазітарам Віктарам Фяцісавым. Нагодай для радасці стала поўная зала аматараў народных і акадэмічных спеваў. Менавіта такія сустрэчы — імпульс творчай дзейнасці калектыву.

У 2015 годзе народны хор адзначыў сваё 45-годдзе вялікім канцэртным выступленнем. Сярод ганаровых гасцей прысутнічаў кампазітар і прадзюсар Алег Елісеенкаў. Ён адзначыў высокі ўзровень выканаўчага майстэрства калектыву.

Я з табой, а ты, а ты са мною,

Як дзве зорачкі ў адной.

Менавіта так можна сказаць пра кіраўніка і ўдзельнікаў народнага хору “Світанак”, якія не з’яўляюцца прафесійнымі музыкантамі, але жывуць любоўю да песні, да гімназіі, у якой працуюць.

Таццяна РАДКЕВІЧ,
намеснік дырэктара гімназіі № 7 Маладзечна

Пакінуць каментарый

Ваш электронны адрас не будзе апублікаваны. Абавязковыя палі пазначаны *