Абласны этап рэспубліканскага конкурсу прафесійнага майстэрства сярод педагагічных работнікаў «Настаўнік года» стартаваў у Магілёве, перадае карэспандэнт «Настаўніцкай газеты».
Сёлета прафесійнае спаборніцтва аб’яднала сотні ініцыятыўных, творчых, мэтанакіраваных педагогаў. Спачатку сваіх лепшых настаўнікаў выбіралі ў кожнай навучальнай установе. Пасля — на раённым узроўні. Да ўдзелу ў адборачным туры абласнога этапу былі дапушчаныя звыш 100 прадстаўнікоў з усіх раёнаў. З іх у фінал выйшлі 40.
— Гэты конкурс — значная падзея для сферы адукацыі рэгіёна. Мінулы раз на заключным этапе нашы педагогі заваявалі 5 прызавых месцаў. Спадзяюся, сёлета каманда выступіць гэтак жа годна. Наперадзе складаны, напружаны, конкурсны шлях. Няхай на ім вас суправаджае перамога, — пажадаў першы намеснік начальніка галоўнага ўпраўлення па адукацыі Магілёўскага аблвыканкама Ігар Лашкевіч.
На працягу тыдня фіналістаў сапраўды чакае шэраг няпростых заданняў. Ім трэба правесці ўрок у незнаёмым класе, прайсці псіхолага-педагагічнае тэсціраванне, даць майстар-клас для студэнтаў. Потым лідары будуць абараняць сістэму сваёй педагагічнай дзейнасці. А ўжо пераможцы прадметных намінацый публічна паразважаюць над тэмай «Выхаваць чалавека». Па выніках гэтых выступленняў і будзе названы «Настаўнік года» Магілёўскай вобласці.
Ганна СІНЬКЕВІЧ
Фота аўтара