Падрыхтоўка ўстаноў адукацыі да новага навучальнага года і асенне-зімовага перыяду пачалася на Гомельшчыне. На базе гомельскай сярэдняй школы № 75 кіраўнікі ўсіх аддзелаў адукацыі вобласці і ўстаноў адукацыі абласнога падначалення абмеркавалі, як паэтапна і без збояў за лета правесці неабходныя работы, паведамляе карэспандэнт “Настаўніцкай газеты”.
Гаворка ішла не толькі пра бягучыя рамонты, але і пра ахову, арганізацыю кантрольна-прапускнога рэжыму, санітарна-гігіенічную, дарожную і пажарную бяспеку ўстаноў адукацыі.
— Хацеў бы зрабіць акцэнт на ахове жыцця і здароўя дзяцей, — задаў тон семінару-практыкуму начальнік галоўнага ўпраўлення адукацыі Гомельскага аблвыканкама Руслан Смірноў. — Гэта самае галоўнае, для чаго мы з вамі жывём і працуем: каб нашы дзеці былі жывыя і здаровыя. Гомельскім абласным цэнтрам па забеспячэнні дзейнасці бюджэтных арганізацый у сферы адукацыі распрацаваны дапаможнік, у якім паэтапна распісана, што вы, кіраўнікі, павінны зрабіць да 1 верасня. Наогул, у гэтым дакуменце распісана ўсё суправаджэнне вашай дзейнасці па падтрыманні матэрыяльнай базы ўстаноў адукацыі на працягу года.
Кіраўнік Гомельскага абласнога цэнтра па забеспячэнні дзейнасці бюджэтных арганізацый у сферы адукацыі Алена Капа нагадала пра тое, што падпісанне сертыфікатаў гатоўнасці да навучальнага года трэба завяршыць не пазней як 20 жніўня, а прыёмка ўстаноў павінна адбыцца да 15 жніўня. Да пачатку новага навучальнага года плануецца даабсталяваць частку школьных аўтобусаў відэарэгістратарамі, а таксама вырашыць пытанні з усталяваннем турнікетаў і трывожных кнопак у асобных установах адукацыі. Цяпер у 1032 установах адукацыі Гомельскай вобласці ёсць пасты вартаўнічай аховы, большая частка з якіх — ведамасная. Сёлета на Гомельшчыне паэтапна будуць перададзены пад фізічную ахову Дэпартамента аховы МУС 17 асобных устаноў адукацыі. Тыя, дзе колькасць навучэнцаў 700 і больш.
— Паэтапна ўстанаўліваюцца сістэмы відэаназірання з падключэннем да рэспубліканскай сістэмы маніторынгу, — адзначыла Алена Капа. — Амаль палова ад агульнай колькасці ўстаноў адукацыі ўжо абсталяваны сістэмамі відэаназірання. Усюды відэакамеры ўстаноўлены з аглядам, які дазваляе кантраляваць тэрыторыю. Важна давесці да ладу і падтрымліваць у спраўным стане фізкультурна-спартыўнае і гульнявое абсталяванне, звярнуць асаблівую ўвагу на цэласнасць агароджы, наяўнасць турнікетаў, замкі на варотах і брамках, схемы руху па тэрыторыі, дарожную разметку, знакі паркоўкі, знешняе асвятленне.
Дарэчы, да пачатку новага навучальнага года плануецца набыць 19 школьных аўтобусаў. Бюджэтам Гомельскай вобласці таксама прадугледжаны сродкі на набыццё тэхналагічнага, халадзільнага і іншага абсталявання.
Ірына АСТАШКЕВІЧ
Фота Алега ІГНАТОВІЧА
