У суботу 20 ліпеня быў дадзены старт прыёмнай кампаніі ва ўстановах, якія рыхтуюць спецыялістаў з сярэдняй спецыяльнай адукацыяй. Каледжы — папулярныя навучальныя ўстановы як сярод вучняў, якія скончылі 9 класаў, так і сярод выпускнікоў школ. Прынамсі, суботняй раніцай у філіяле БДУІР “Мінскім радыётэхнічным каледжы” было шматлюдна.
Яшчэ на прыступках пачула, як бацька даводзіў сыну: “Будзеш праграмным спецыялістам інфармацыйных тэхналогій”. А ўжо на другім паверсе, дзе прымалі дакументы, такіх татаў і мам са сваімі дзецьмі ўбачыла вельмі шмат. Хоць эмацыянальны градус і быў павышаны, але чарга рухалася даволі хутка. На ўсе пытанні ветліва адказвалі старшакурснікі каледжа і намеснік дырэктара Франц Шумчык. У самой прыёмнай камісіі працавалі яшчэ некалькі спецыялістаў, якія кожнаму абітурыенту тлумачылі далейшы алгарытм дзеянняў. А першым абітурыентам, якiя падалі заявы на навучанне, адміністрацыя каледжа ўручыла сувеніры з сімволікай БДУІР-МРК.
У Мінскім радыётэхнічным каледжы прымалі дакументы на 6 спецыяльнасцей бюджэтнага навучання (план прыёму — 215 чалавек): “Праектаванне і вытворчасць радыёэлектронных сродкаў”, “Тэхнічная эксплуатацыя радыёэлектронных сродкаў”, “Праграмуемыя мабільныя сістэмы”, “Праграмнае забеспячэнне інфармацыйных тэхналогій”, “Электронныя вылічальныя сродкі”, “Мікра- і нанаэлектронныя тэхналогіі і сістэмы”.
6 такіх жа спецыяльнасцей прадугледжаны і для платнага навучання (план прыёму — 150 чалавек).Прыём дакументаў ажыццяўляецца на аснове базавай, агульнай сярэдняй і прафесійна-тэхнічнай адукацыі. У каледжы існуе дзённая і завочная форма навучання.
“Конкурсы ў нашым каледжы вялікія як сярод дзевяцікласнікаў, так і сярод тых, хто скончыў 11 класаў. Напрыклад, у мінулым годзе на спецыяльнасць “Праграмнае забеспячэнне інфармацыйных тэхналогій” (бюджэт) прахаднымі сталі 9,7 бала. А мінімальнымі прахаднымі былі 7,8 бала. У гэтым годзе чакаем не меншыя прахадныя балы, можа, нават вышэйшыя. Шмат зваротаў да нас паступіла з Расійскай Федэрацыі, прычым гэта школьнікі з высокімі выніковымі адзнакамі, так што попыт на навучанне ў нашым каледжы стабільны.
Самымі папулярнымі спецыяльнасцямі каледжа з’яўляюцца, як вы ўжо зразумелі, “Праграмнае забеспячэнне інфармацыйных тэхналогій” і “Праграмуемыя мабільныя сістэмы”. Сёлета на першую з іх мы павялічылі план набору на 30 чалавек (на платнай аснове на базе 9 класаў)”, — паведаміў дырэктар каледжа Сяргей Анкуда. Дарэчы, за першы дзень працы прыёмная камісія прыняла 110 заяў, большасць з іх (76) была пададзена на спецыяльнасць “Праграмнае забеспячэнне інфармацыйных тэхналогій”.
У Мінскі радыётэхнічны каледж штогод паступаюць школьнікі з усіх рэгіёнаў краіны (і з году ў год іх колькасць расце). Для такіх навучэнцаў у каледжы прадугледжаны інтэрнат. Як заўважыў дырэктар, маніторынг апошніх гадоў сведчыць, што ўзровень ведаў у рэгіянальных школьнікаў вышэйшы, чым у сталічных. Разам з тым тыя, хто паступіў у каледж, стараюцца вучыцца з першых дзён. У першыя два гады працэнт адлічаных вельмі нізкі.
Амаль два гады ўсе выпускнікі каледжаў маюць роўныя правы пры паступленні на скарочаны тэрмін навучання ва ўстановы вышэйшыя адукацыі. Галоўнае, каб тыпавыя планы адпавядалі спецыяльнасцям ва ўніверсітэтах. Выпускнікі Мінскага радыётэхнічнага каледжа могуць працягнуць сваё навучанне ў БДУІР, БДУ, БНТУ. Акрамя таго, паралельна яны могуць працаваць. Колькасць прапаноў работадаўцаў на тых, хто вучыўся ў Мінскім радыётэхнічным каледжы, увесь час павялічваецца. І гэта не дзіва, бо гэтая навучальная ўстанова ўвесь час развіваецца. Напрыклад, у лютым бягучага года тут адкрылі рэсурсны цэнтр “Электроніка і прыборабудаванне” з новым сучасным абсталяваннем.
Рэалізуецца ў каледжы інклюзіўны падыход у навучанні. Тут вучацца калясачнікі. Адна з такіх навучэнак (скончыла першы курс) рэалізуе праект “Мабільны навігатар для людзей з абмежаванымі магчымасцямі”. Каледж уваходзіць у склад бізнес-інкубатара БДУІР, працуе там у двух праектах. Адзін з іх якраз па мабільным навігатары. І, дарэчы, да яго далучылася шмат людзей, што гарантуе поспех.
Сёлета прыёмная кампанія праходзіць у 110 каледжах, у тым ліку 9 — прыватнай формы ўласнасці, а таксама ў 83 установах адукацыі, якія рэалізуюць адукацыйныя праграмы сярэдняй спецыяльнай адукацыі. План прыёму гэтага года складае 40,4 тысячы чалавек, з іх на бюджэтнай форме навучання — 25,4 тысячы. Прыём будзе весціся па 156 спецыяльнасцях.
Абітурыенты, якія паступаюць ва ўстановы сярэдняй спецыяльнай адукацыі пасля 9-і класаў на ўсе спецыяльнасці, акрамя тых, па якіх неабходна здаваць уступныя іспыты (творчыя і спартыўныя), павінны прайсці конкурс сярэдняга бала пасведчання аб агульнай базавай адукацыі.
Абітурыенты, якія паступаюць на аснове агульнай сярэдняй адукацыі, здаюць два абавязковыя ўступныя экзамены па вучэбных прадметах у форме цэнтралізаванага тэсціравання. Пры паступленні на творчыя спецыяльнасці і спецыяльнасці спорту — уступныя іспыты па мове (беларускай ці рускай) у форме ЦТ і іспыты па спецыяльнасці.
Уступная кампанія ва ўстановах сярэдняй спецыяльнай адукацыі пройдзе з 20 ліпеня да 17 жніўня. Для ўсіх прыёмных камісій устаноўлены адзіны рэжым работы: яны будуць працаваць з 9.00 да 18.00, у тым ліку ў суботы (20, 27 ліпеня, 3 і 10 жніўня). Будуць задзейнічаны таксама і нядзелі (4 і 11 жніўня) для прыёмных камісій тых навучальных устаноў, у якіх у гэты дзень праводзяцца ўступныя выпрабаванні. Інфармацыя будзе абнаўляцца кожны дзень не радзей як адзін раз у тры гадзіны работы прыёмнай камісіі. А ў апошні дзень інфармаванне абітурыентаў аб ходзе прыёму дакументаў спыніцца ў 15.00.
Вольга ДУБОЎСКАЯ.
Фота аўтара.